2 րոպեի ընթերցում
ԵՐԵՎԱՆ, 20 ՀՈՒԼԻՍԻ, ԱՐՄԵՆՊՐԵՍ: Թուրքիայում շրջանառության մեջ է մտել տեղեկությունն այն մասին, որ ամենայն հավանականությամբ թուրք-սիրիական սահմանին գտնվող Սուրուչ գավառում իրականացված պայթյունի հեղինակը եղել է «Իրաքի և լևանտի իսլամական պետություն» իսլամիստական կազմակերպության գաղափարներին հարող 18-ամյա մի աղջիկ: Ինչպես հաղորդում է «Արմենպրես»-ը, թուրքական «Հուրիեթ» պարբերականի հետ զրույցում այս վարկածը հայտնել է Սուրուչի քաղաքապետարանի ներկայացուցիչներից մեկը:
Սուրուչի քաղաքապետարանին պատկանող մեքենաները դեպքի վայրում թուրքերեն և քրդերեն հայտնում են տարածքում երկրորդ պայթյունի հավանականության մասին՝ կոչ անելով հեռանալ այդ վայրից:
Շանլըուրֆայի նահանգապետ Իզզեթթին Քյուչուքը նշել է, որ անվտանգության նկատառումներից ելնելով Սուրուչ մուտք գործող և այստեղից հեռացող բոլոր անձինք հատուկ զննվում են:
Թուրքիայի Շանլըուրֆա (Ուրֆա) շրջանի Սուրուչ գավառում իրականացվել է ահաբեկչություն, որը խլել է 28 մարդու կյանք, իսկ վիրավորների թիվը հասել է 100-ի:Նշվում է, որ զոհերի թիվը կարող է ամեն պահի ավելանալ:
Քոբանիին օգնություն տրամադրելու նպատակով Ստամբուլից Սուրուչ մեկնած Սոցիալիստ երիտասարդության ընկերակցության դաշնության շուրջ 150 անդամից բաղկացած խումբը Սուրուչում ելույթ է ունեցել, երբ գործի է դրվել պայթուցիկը: Պայթյունը որոտացել է անմիջապես մարդկանց շարքերում:Երիտասարդ սոցիալիստներն այս գիշեր պետք է անցնեին Քոբանի՝ փոխանցելու իրենց հավաքած օգնությունը:Թուրքիայի ներքին գործերի նախարարությունն արդեն հայտարարություն է արել կատարվածի առնչությամբ՝ դատապարտելով ահաբեկչական գործողությունը: Նախարարության տվյալներով՝ ահաբեկչությունն իրականացրել է մահապարտ ահաբեկիչը:Հիվանդանոց տեղափոխվածների մի մասի վիճակը ծանր է, նրանց կյանքը փրկելու համար արդեն կոչ են անում արյուն հանձնել: