2 րոպեի ընթերցում
ԵՐԵՎԱՆ, 13 ՀՈՒԼԻՍԻ, ԱՐՄԵՆՊՐԵՍ: Ֆրանսիացի դերասան Պատրիկ Շենեն ուրախ է Սերժ Ավետիքյանի ֆիլմում նկարահանվելու համար: «Ոսկե ծիրան» միջազգային 12-րդ կինոփառատոնի պատվավոր հյուրը լրագրողների հետ զրույցում հուլիսի 13-ին տեղեկացրեց, որ Խաչիկ գյուղում կինոնկարի նկարահանումը հիասքանչ փորձ էր իր համար:
«Ես նկարահանվել եմ ավելի քան 75 ֆիլմերում, բայց հայաստանյան այս փորձը շատ թանկ էր, հետաքրքիր: Նկարահանման պահին չես կարող հասկանալ, թե ինչպիսին կլինի ֆիլմի վերջը: Ես ծնվել, աշխատել եմ Փարիզում, և հիմա հայտնվում եմ աշխարհի ամենախուլ անկյուններից մեկում, հանդիպում եմ մարդկանց, որոնք բաց են, զվարճալի: Ինձ համար իսկապես մեծ հաճույք էր այդ մարդկանց հետ շփվելը»,-«Արմենպրես»-ի փոխանցմամբ՝ նշեց դերասանը:
Ֆրանսահայ ռեժիսոր Սերժ Ավետիքյանն էլ տեղեկացրեց, որ Խաչիկ գյուղում (Վայոց ձոր) ավարտվել են իր նոր կինոնկարի նկարահանման աշխատանքները:
«Ֆրեդերիկ Նիդերմայերը իմ ֆիլմի գլխավոր պրոդյուսերն է ֆրանսիական կողմից: Հայաստանում համապրոդյուսերն են Միքայել Դովլաթյանն ու Արմեն Համբարձումյանը: Հայաստանի ազգային կինոկենտրոնի և ՀՀ մշակույթի նախարարության աջակցությամբ կարողացանք ոտքի դնել այս երկկողմ արտադրությունը: Բարեբախտաբար, ֆիլմի նկարահանման վերջին օրերը համընկան փառատոնի մեկնարկի հետ, մենք վերջացրինք նկարահանումները Խաչիկ գյուղում: Ես վերադառնում եմ Ֆրանսիա, մոնտաժային աշխատանքներն ընթացքի մեջ են»,- նշեց Սերժ Ավետիքյանը:
Ռեժիսորը նշեց, որ ֆիլմը երկլեզու է՝ հայերեն և ֆրանսերեն: «Արսինե Խանջյանը ֆիլմում մի հետաքրքիր անձնավորության է մարմնավորում, որն ապրում է Հայաստանում, բայց չի ծնվել այստեղ և որոշել է մնալ և դասավանդել ֆրանսերեն: Ֆիլմում կան տարբեր գծեր. ես արդեն երիտասարդ ռեժիսոր չեմ, գիտեմ, որ ամեն ինչ չէ, որ պետք է ասել մեկ ֆիլմում: Ֆիլմն ունի իր գիծը, որ պահպանվում է մինչև վերջ, և իր մեջ տարբեր շերտեր կան»,- հավելեց Ավետիքյանը՝ նշելով, որ Պատրիկ Շենեն հաճույքով է նկարահանվել կինոնկարում: Ֆիլմի նախնական անունն է «Ինչպես ամերիկյան մի երգ»: