3 րոպեի ընթերցում
ԱՐՏԱՇԱՏ, 23 ՀՈՒՆԻՍԻ, ԱՐՄԵՆՊՐԵՍ : Արտաշատի Ամո Խարազյանի անվան պետական դրամատիկական թատրոնը Ցեղասպանության 100-րդ տարելիցին նվիրված միամսյակի շրջանակում ունեցել է ավելի քան 3000 հանդիսատես: Այդ ընթացքում հանդիսատեսի դատին է հանձնվել երկու նոր ներկայացում` Մարկ Արենի «Վայրի վարդերը» եւ Պարույր Սեւակի «Ողբամ մեռելոց, կոչեմ ապրողաց» գրական երաժշտական թատերականացված կոմպոզիցիան: Թատրոնը համագործակցել է նաեւ հանրակրթական դպրոցների հետ` դահլիճն անվճար տրամադրելով այդ թեմայով կազմակերպված միջոցառումների համար:
«Խաղացել ենք 10 ներկայացում` լեփ-լեցուն դահլիճում: Շատ լավ հանդիսատես ենք ունեցել, գալիս էին մեծ սիրով եւ դահլիճը լքում բուռն ծափահարություններով»,-«Արմենպրես»-ի թղթակցի հետ զրույցում ասաց թատրոնի տնօրեն Գեղանուշ Սայադյանը՝ ավելացնելով, որ հյուրերը եղել են մարզային կառույցի ղեկավարներ, մտավորականներ, մանկավարժներ` հանրակրթական եւ երաժշտական դպրոցներից, մանկապարտեզներից: «Հնարավոր ամեն բան արել ենք, որպեսզի հանդիսատեսը գոհ հեռանա, եւ ողջ ապրիլ-մայիս ամիսը ներշնչված լինի Ցեղասպանության 100-ամյա տարելիցի ոգով»,-ավելացրեց նա:
Առաջին ներկայացման սցենարը մոսկվաբնակ տաղանդավոր գրող Մարկ Արենի /Կարեն Մարգարյան/ «Այնտեղ, որտեղ ծաղկում են վայրի վարդերը» պիեսի հիման վրա ստեղծված մեկժամանոց բեմադրությունն էր, որի մեջ ընդգրկված էին թատրոնի 20 դերասան եւ հինգ երեխա:
Երկրորդ բեմադրությունը սեւակյան թեմայով գրական-երաժշտական 40-րոպեանոց կոմպոզիցիան է՝ ստեղծված բանաստեղծի «Եռաձայն պատարագ» եւ «Անլռելի զանգակատուն» ստեղծագործությունների հիման վրա: Այստեղ ընդգրկված էին վեց դերասան: Բեմադրությունների գեղարվեստական ղեկավարն է ՀՀ վաստակավոր գործիչ Հայկ Մնացականյանը:
Հունիսին թատրոնի անձնակազմը վերականգնել եւ արդեն փոքրիկների դատին է հանձնել «Կոշկավոր կատուն» ներկայացումը: Բեմադրությունները կշարունակվեն նաեւ հուլիսին: Դեկտեմբերին կունենան եւս մեկ պրեմիերա` ամանորյա թեմայով:
82-ամյա թատրոնի դերասանական անձնակազմի 20-ից 12-ը երիտասարդ կադրեր են: Չորսը վաստակավոր արտիստի կոչում ունեն:
Որպես մարզային մշակութային օջախ՝ Ամո Խարազյանի անվան պետական դրամատիկական թատրոնը բավականին ակտիվ գործունեություն է ծավալում: Պարբերաբար թարմացվում եւ հարստացվում է թատրոնի խաղացանկը, յուրաքանչյուր տարի ներկայացվում է 3-4 պրեմիերա: Նախորդ տարի բեմադրել են Պարույր Սեւակի «Բարի երազս` ձեզ, սիրելիներ» քնարական ֆանտազիան, Կլոդ Մանիեի «Օսկար» եւ Գրիգոր Զոհրապի «Կյանքն ինչպես որ է» նովելների հիման վրա ստեղծված բեմադրությունները:
Լիլիթ Մաճկալյան