2 րոպեի ընթերցում
ԳԱՎԱՌ, 17 ՀՈՒՆԻՍԻ, ԱՐՄԵՆՊՐԵՍ: Գեղարքունիքի մարզի Ծովագյուղ համայնքում այս տարի ցանվել են 442 հեկտար հացահատիկային մշակաբույսեր, որոնցից` 300 հեկտարը կազմում են աշնանացան ցորենի, 142 հեկտարը`գարնանացան գարու, 61 հեկտարը` կարտոֆիլի, 36 հեկտարը` բանջարեղենի, 261 հեկտարը` միամյա եւ 300 հեկտարը` բազմամյա խոտաբույսերի ցանքերը:
Ինչպես «Արմենպրես»-ին տեղեկացրեց Ծովագյուղի գյուղատնտեսական կոոպերատիվի անդամ Արտաշես Խալաֆյանը, կա նաեւ 20 հեկտար բազմամյա խոտաբույսերի ենթացանք , որի նպատակն է եկող տարում եւս ավելացնել ցանքատարածությունները: Նույն աղբյուրի համաձայն`Ծովագյուղում վարելահողերի մշակովի ցանքատարածությունները 2015 թվականին նախորդ տարվա համեմատ անմշակ հողերի հաշվին աճել են 100 հեկտարով: Այս տարի խոշոր եղջերավոր անասունների թիվն աճել է 9, մանր եղջերավոր անասունների թիվը` 332 գլխով: Կաթնատու կովերի թիվը նախորդ տարվա 1435 գլխի փոխարեն այս տարի կազմել է 1767 գլուխ:
ՀՀ կառավարության կողմից իրականացվող «Համայնքների գյուղատնտեսական ռեսուրսների կառավարման եւ մրցունակության» ծրագրի եւ այդ ծրագրի շրջանակներում ձեռք է բերվել 5 անվավոր տրակտոր, 4 հակավորող մեխանիզմ, ձեռքի մեքենայական խոտհնձիչներ, 1 հատ տրակտորային խոտհնձիչ, 2 արտասահմանյան շարքացան, 1 գութան, 1 խոտհավաք եւ 1 բեռնատար մեքենա: Ծրագիրը գյուղում կյանքի է կոչվել 2013 թվականից, կազմակերպվել է գյուղատնտեսական կոոպերատիվ, որի աշխատանքները նպաստում են գյուղատնտեսության զարգացմանը:
«Գյուղատնտեսական աշխատանքների մեքենայացումը անասելի հեշտացրել է ծովագյուղցու աշխատանքը եւ գյուղատնտեսության վար ու ցանքի, բույսերի մշակման աշխատանքների 50-70 տոկոսը կատարվում է ձեռքբերված գյուղտեխնիկայի հաշվին»,- նշեց Արտաշես Խալաֆյանը:
ԽոսրովԽլղաթյան