Նիժնի Նովգորոդում բացվել է սարուխանցի Վազգեն Դանոյանի նկարների ցուցահանդեսը

ԳԱՎԱՌ, 12 ՀՈՒՆԻՍԻ, ԱՐՄԵՆՊՐԵՍ: ՌԴ Նիժնի Նովգորոդ քաղաքի Սուրբ Ամենափրկիչ եկեղեցում հունիսի 11-ին բացվել է մեր հայրենակից նկարիչ Վազգեն Դանոյանի գեղանկարչական եւ գրաֆիկական աշխատանքների ցուցահանդեսը` նվիրված Հայոց եղեռնի 100-րդ տարելիցին:

Ինչպես «Արմենպրես»-ին տեղեկացրեց Վազգեն Դանոյանը, ցուցահանդեսի բացմանը աջակցել էին Նիժնի Նովգորոդ քաղաքի հայագիտության կենտրոնի տնօրեն Ռեգինա Սաֆարյանը եւ Սուրբ Ամենափրկիչ եկեղեցու հոգեւոր հովիվ Տեր Սեբեոս Գալաչյանը: Ցուցահանդեսն առաջին օրն ունեցավ շուրջ 100 այցելու, որոնց թվում էին Նիժնի Նովգորոդի տարածաշրջանում բնակվող մեր հայրենակիցներն ու տեղի արվեստասեր ռուս հասարակությունը: Ցուցահանդեսին ներկայացվեց արվեստագետի ստեղծած գործերից 50-ը, որոնք հիմնականում պատկանում էին գրաֆիկայի եւ գեղանկարչության ժանրերին:

Ըստ Ռեգինա Սաֆարյանի` Վազգեն Դանոյանը սիրում է վառ, հագեցած գույներ, սառը եւ տաք գամմաների համարձակ համադրություն: Նա ստեղծել է ավելի քան 200 կտավ` տարբեր թեմաներով:

«Իմ ստեղծագործություններում ակնհայտորեն առավելություն եմ տալիս հայրենի երկրի, հայրենի հող ու ջրի բնանկարներին եւ հարազատ դեմքերի կերտմանը»,-ասաց ցուցահանդեսի հեղինակը:

Երկար տարիներ հայրենիքից հեռու գտնվելը նրա նկարներում արտահայտվել է կարոտի տեսքով: Հայոց ցեղասպանության թեմաներով նա բազում գործեր է կերտել, որոնք ներկաներին ստիպում են խոնարհվել Հայոց վշտի առջեւ: «Մեր ազգը նպատակաուղղված է ոչ միայն պաշտպանելու մարդկայնությունը եւ պատմականորեն ստիպելու, որպեսզի վերականգնվի արդարությունը, այլեւ արարելու, զարգանալու եւ իր արժանի տեղը զբաղեցնելու մարդկության համաշխարհային ընտանիքում» -իր խոսքում նշեց քաղաքի հայագիտության կենտրոնի տնօրենը: «Մենք կաշխատենք, որ այս ցուցահանդեսը նորովի ներկայացվի Մոսկվայի արվեստասեր հասարակայնությանը»,- ասաց Տեր Սեբեոս Գալաչյանը:

Վազգեն Դանոյանի աշխատանքները հաջողությամբ ցուցադրվել են Մոսկվայում կայացած համառուսաստանյան «Հայրենիքի փառավոր որդիները» խորագիրը կրող ցուցահանդեսում, նկարիչ Ա. Վ. Ստուպինայի հիշատակին նվիրված ցուցահանդեսում, որը կայացավ Նովգորոդում եւ ներկայացրեց Ռուսաստանի Դաշնության 18 շրջանների ժողովրդական վարպետ ստեղծագործողների կտավները: Նկարչի կտավները ցուցադրվել են նաեւ ՌԴ տարբեր շրջաններում կայացած ցուցահանդեսներում: Հայոց ցեղասպանության 100-րդ տարելիցին նվիրված ցուցահանդեսը կգործի մինչեւ հունիսի 28-ը:

ԽոսրովԽլղաթյան