3 րոպեի ընթերցում
ԳԱՎԱՌ, 11 ՀՈՒՆԻՍԻ, ԱՐՄԵՆՊՐԵՍ: Գեղարքունիքի մարզպետ Ռաֆիկ Գրիգորյանը հերթական աշխատանքային այցը կատարեց Վարդենիսի տարածաշրջանի Շատջրեք, Գեղամաբակ, Այրք, Ներքին Շորժա, Վերին Շորժա համայնքներ: «Արմենպրես»-ի տեղեկացմամբ` Շատջրեքում համայնքի անդամները բարձրացրին համայնքային կենտրոնի շենք ունենալու, դպրոցական շենքի անբարեկարգ վիճակի, արոտների համար բավարար տարածք եւ գյուղատնտեսկանա տեխնիկա ձեռք բերելու, կաթի մթերման գների նվազման հետ կապված հարցեր: Մարզպետը համայնքի ղեկավարությանը եւ բնակիչներին պարզաբանեց, որ համայնքային կենտրոնի շենքը եւ նորոգման համար պահանջվող միջոցները կհատկացնի ՀՀ կառավարությունն՝ այս տարվա ընթացքում:
«Կաթի մթերման գների հետագա նվազումը փորձում ենք զսպել տեղական մթերողի ուժերով, ուստի, խորհորդ կտայի կաթը հանձնել Ակունքի «Էկոկաթ» ձեռնարկությանը, որը կաթի մեկ լիտրը մթերում է 120 դրամով: Արոտային տարածքներ վարձակալելու եւ նոր գյուղտեխնիկա ձեռք բերելու հետ կապված հարցերը կուսումնասիրվեն մարզպետարանի աշխատանքային խմբի կողմից , որոնց հնարավորության դեպքում կտրվեն համապատասխան լուծումներ»,- նշեց Ռաֆիկ Գրիգորյանը:Հանդիպման ավարտին մարզպետն այցելեց Շատվանի միջնակարգ դպրոց եւ տեղում ծանոթացավ շենքային անբարեկարգ պայմաններին: ԽՍՀՄ ժամանակներից ժառանգություն մնացած եւ ձեղնահարկ չունեցող դպրոցական շենքը ձնհալից եւ անձրեւաջրերից պաշտպանելու միջոց դեռ չկա, որպեսզի շենքը փրկվի հետագա կաթոցներից ու քայքայումից:
«Մեր աշխատանքային խումբը կուսումնասիրի ընդհանուր վիճակը եւ կներկայացնի համապատասխան առաջարկություն, որից հետո կփորձենք միջոցներ գտնել, մեղմել ու բարվոքել վիճակը, մինչեւ որ կարողանանք գտնել հարցի հիմնական լուծումը»,-հավաստիացրեց մարզպետը:Գեղամաբակ համայնքում բնակիչներն առաջ քաշեցին խմելու եւ ոռոգման ջրի հետ կապված խնդիրները , Այրքում եւ Ներքին Շորժայում դժգոհեցին ճանապարհների անբարեկարգ վիճակից, խմելու ջրի մատակարարման անբավարարությունից, կաթի մթերման գների անկումից: Հայաստանի Հանրապետությունում օրենքով սահմանված կարգով գրանցնվելու համար մարզպետին խնդրանքով դիմեցին վերջերս Ռուսաստանի Դաշնությունից Վերին Շորժայում հաստատված բազմաշունչ ընտանիքի անդամները: «Գեղամաբակի եւ Այրքի խմելու ջրատարների նորոգման կամ կառուցման խնդիրներն առաջիկայում լուծում կստանան IFAD-ի ծրագրերով, իսկ Ներքին Շորժայի խմելու ջրի հարցը կուսումնասիրենք եւ կփորձենք ելք գտնել: Մասնակի բարեկարգման ելք կփորձենք գտնել նաեւ Այրք-Վերին Շորժա-Ներքին Շորժա ճանապարհների հարթեցման եւ բարեկարգման համար»,- նշեց մարզպետ Ռաֆիկ Գրիգորյանը: Մարզպետը տեղերում կաթ արտադրող տնտեսություններին մեկ անգամ եւս հավաստիացրեց` կաթի մթերման հարցում համագործակցել «Ակունքի» էկոկաթ ձեռնարկության հետ, որն այս օրերին աշխատում է երեք հերթափոխով եւ պատրաստ է բոլոր դիմած տնտեսություններից կաթ մթերել գյուղացիների համար առայժմ ամենաձեռնտու գներով:
Խոսրով Խլղաթյան