Երազգավորս գյուղում եկեղեցու հիմնարկեք է կատարվել

ԳՅՈՒՄՐԻ, 9 ՀՈՒՆԻՍԻ, ԱՐՄԵՆՊՐԵՍ : Շիրակի թեմում կատարվեց ևս մեկ եկեղեցու հիմնարկեք: Թուրքիային սահմանակից գյուղը՝ Երազգավորսը, 1984 թվականից ի վեր Ախուրյանի ջրամբարի կառուցման պատճառով եկեղեցի չի ունեցել, ինչպես հարակից շատ գյուղերը. եկեղեցին մնացել է ջրի տակ: Սակայն, գյուղացիները մինչ օրս էլ խոսում են Երազգավորսի նախկին եկեղեցու գեղեցկության մասին: Ինչպես «Արմենպրես»-ին տեղեկացրեց համայնքի ղեկավար Արտաշես Մխիթարյանը, եկեղեցին 10-րդ դարի, հետագայում ավերված կառույց է եղել, և 1977 թվականին կատարված պեղումների արդյունքում հստակեցվել է, որ եկեղեցին եղել է մեծ, գմբեթավոր: Նախկին եկեղեցու քարերի մի մասը պահպանվել է՝ հետագայում եկեղեցի կառուցելու ակնկալիքով, սակայն այդպես էլ մինչ օրս չի կառուցվել եկեղեցին: Վերջերս գյուղացիներից մեկի՝ բանաստեղծ Սամվել Մարգարյանի նախաձենությամբ, եկեղեցու շինարարության համար համայնքապետարանը հատկացրել է մոտ 4 հազար հեկտար տարածք: Եկեղեցին կլինի բազելիկ, կունենա զանգակատուն, իսկ հատկացված տարածքի մեծությունը հնարավորություն կտա հետագայում, ֆինանսական հատկացումների դեպքում, կառուցել նաև կիրակնօրյա դպրոց: Շինարարության ընթացքում կօգնագործվեն նաև հին եկեղեցու քարերը: Կարևորելով եկեղեցու դերը համայնքում՝ Մխիթարյանը նշեց, որ, լինելով Գյումրիին մոտ, այս տարիների ընթացքում երազգավորսցիները մկրտության ու հարսանիքի ծեսն անում էին Գյումրիում: «Գյուղում շատ խնդիրներ կան, բայց ամենակարևորը մեզ համար եկեղեցին է: Եթե քայլեր չձեռնարկվեն, գյուղերում աղանդները կշատանան: Սա մեր Առաքելական Սուրբ եկեղեցին պահելու ևս մեկ դրսևորում է: Հուսով եմ, կհաջողվի Աստծո կամոք շուտ ավարտին հասցնել շինարարությունը»,-նշեց համայնքի ղեկավարը:Գյուղում ոչ միայն եկեղեցու շինարարության, այլ նաև հիմքային աշխատանքների իրականացման նախաձեռնությունը Սամվել Մարգարյանինն է, ով լրագրողների հետ հանդիպման ժամանակ տեղեկացրեց, որ իր համար միշտ երազանք է եղել իր հայրենի գյուղում եկեղեցի ունենալը: «Հայրենի ծննդավայրում եկեղեցի ունենալը միշտ իմ համար երազանք է եղել, մինչդեռ 10-րդ դարում, պատմական Երազգավորսում՝ Շիրակավանում, Սմբատ Բագրատունին երկու եկեղեցի է կառուցել՝ Սուրբ Աստվածածինը և Սուրբ Խաչը, և փաստորեն, հազար տարի անց, պատմական Շիրակավանում կառուցվում է եկեղեցի: Փա՛ռք Տիրոջն ու համայնքին, որ արձագանքեցին իմ նախաձեռնությանը: Կարևորը սկիզբն է: Հուսով եմ՝ նախաձեռնությանը կմիանան շատերը: Այո՛, հազար ու մի հոգսեր ունենք, շատ դժվարություններ կան, բայց մեր նախնիների նման՝ թեկուզ զրկանքներով, պետք է Աստծո տուն կառուցենք»,- ընդգծեց Սամվել Մարգարյանը:Այս անգամ ևս թեմի առաջնորդի ձեռամբ հիմնարկեքի կարգ կատարվեց՝ նախ ջրով, ապա գինով լվացվեց 16 գլաքար՝ խորհրդանշելով 12 առաքյալներին, 2 ավետարանիչներին, Պողոս առաքյալին և Գրիգոր Լուսավորչին՝ նրանց, ում վրա հիմնաված է եկեղեցին: Քարերը լվանալուց և սուրբ մյուռոնով օծելուց հետո 16 մկրտված տղամարդ քարերը տեղադրում են եկեղեցու տարբեր հատվածներում: «Հոգին է կենդանարար, ոչ մարմինը: Սա նաև վերաբերում է համայնքին: Հոգի պետք է լինի, որ նշանակի, որ համայնքը կա: Եթե ուզում ենք, որ համայնքը կենդանության նշաներ ցույց տա, ուրեմն, պետք է եկեղեցի ունենա: Վերջին շրջանում շատերն ասում են, թե պետք չէ այսքան եկեղեցի սարքել, բայց մոռանում են, որ հոգին է կենդանություն տալիս: Այսօր համայնքը ոտքի է կանգնել, որ եկեղեցի, հոգի ունենա ու կենդանության նշաններ ցույց տա: Հատկապես այս գյուղերում, սահմանից այս կողմ՝ թո՛ղ կառուցվեն եկեղեցիները, որ սահմանից այն կողմ տեսնեն, որ հայ կա ու եկեղեցի է կառուցում»,- իր խոսքում նշեց Միքայել սրբազանը՝ կոչ անելով բոլոր երազգավորսցիներին միանալ այս աջակցությանը՝ ֆինանսական միջոցներով կամ աշխատանքով, կամ էլ՝ աղոթքով:

Արմենուհի Մխոյան