Գյումրին և ՉԺՀ Սիան քաղաքը կնքեցին բարեկամական հարաբերությունների մասին համաձայնագիր

ԳՅՈՒՄՐԻ, 8 ՀՈՒՆԻՍԻ, ԱՐՄԵՆՊՐԵՍ: Գյումրու և Չինաստանի Սիան քաղաքի միջև կնքվեց բարեկամական հարաբերություններ հաստատելու մասին համաձայնագիր: Այն ստորագրվեց հունիսի 8-ին Գյումրու «Հոկտեմբեր» կինոթատրոնում՝ Սիանի քաղաքապետարանի պատվիրակության Գյումրի կատարած այցի շրջանակներում: Այսուհետ՝ ՀՀ Գյումրի քաղաքի քաղաքապետ Սամվել Բալասանյանի և Չինաստանի ժողովրդական Հանրապետության Սիան քաղաքի քաղաքապետ Դոն Ցզյունի ստորագրությամբ վավերացված համաձայնագրով՝ երկու քաղաքների միջև դեռ 2013 թվականից ստեղծված հարաբերությունները թևակոխում են նոր փուլ՝ ավելի գործնական: Թեև համագործակցության էական արդյունքերը տեսանելի կլինեն մի փոքր ավելի ուշ, սակայն, այսօր իսկ ակնհայտ են այն ոլորտները, որտեղ փոխհամագործակցությունը հանարվոր Է:

Գյումրու և Սիանի միջև հարաբերությունների զարգացման արդյունավետ ընթացքի դեպքում դրանք հիմք կհանդիսանան երկու երկների այլ քաղաքների համագործակցության: Այս մասին փաստեցին երկու կողմերի ներկայացուցիչները, մինչ համաձայանգրի ստորագրումը տեղի ունեցած «Գյումրի-Սիան» համաժողովի ընթացքում:

Ողջունելով համաժողովի բոլոր մասնակիցներին՝ Գյումրու քաղաքապետ Սամվել Բալասանյանը կարևորեց Գյումրի-Սիան կապն ու հետագա հնարավոր համագործակցությունը՝ այն տեսնելով մարզական և մշակութային ոլորտներում: Սակայն դա միայն սկիզբ կարող է լինել: Գյումրին միացել է Մետաքսի ճանապարհի տնտեսական գոտուն՝ ավելի քան երկու տասնյակ քաղաքների միջև ստորագրված համատեղ հուշագրով, որը կնքնվել է 2014 թվականի սեպտեմբերին: Դա ևս հնարավորություն է՝ համագործակցության հետագա զարգացման: «Հայ-չինական գործնական հարաբերությունները հազարամյակների պատմություն ունեն: Այսօր էլ դրանք կրում են հետևողական ու դինամիկ զարգացող բնույթ: Չինաստանի հետ բազմակողմանի հարաբերությունների զարգացումը ՀՀ արտաքին քաղաքականության գերակա ուղղություններից մեկն է»,- նշեց Սամվել Բալասանյանը:

Սիանի քաղաքապետ Դոն Զզյուն ևս իր խոսքում դրական համարեց երկու երկրների միջև ստեղծված ու զարգացող կապը, որի արդյունքում՝ ստեղծվել են համատեղ ձեռնարկություններ: Սակայն, սա կարելի է համարել նոր, բայց արդեն տեղական մակարդակով հարաբերությունների ստեղծման սկիզբ:

«Գյումրի-Սիան» համաժողովը հնարավորություն տվեց նաև Սիանից ժամանած առևտրատնտեսական ներկայացուցչական պատվիրակությանը ծանոթանալու Գյումրու ներուժին ու այն հնարավորություններին, որոնք կարող են գրավել սիանցի գործարարներին: Օդանավակայանի և երկաթգծի առկայությունից բացի, քաղաքն ունի նաև մտավոր լավ ներուժ, ինչի մասին խոսեց Գյումրու «Տեխնոլոգիական կենտրոն»-ի ղեկավար Միսակ Ղարագոզյանը՝ ընդգծելով, որ ներկայումս կենտրոնում գործում են 7 միջազգային և 13 նորաստեղծ ընկերություններ:

Թեև նախկին ԽՍՀՄ-ում տեքսիլ արտադրող ախոշորագույն քաղաքներից մեկը համարվող Գյումրին այսօր չունի այդ ներուժը, սակայն համագործակցություն կարելի է տեսնել այս որորտում ևս ՝ իր խոսքում փաստեց Սիանի «Տեքստիլ Գրուպ» ՍՊԸ-ի գլխավոր տնօրեն Լիու Շաոմին:

Համաժողովի փակման խոսքով հանդես գալով ՀՀ-ում ՉԺՀ դեսպանատան առևտրատնտեսական հարցերով պատասխանատու Վան Շիցայը, ով հույս հայտնեց, որ երկու քաղաքների միջև շատ շուտով համագործակցության քայլերը տեսանելի կլինեն: «Ուրախ ենք այսօր գտնվել Գյումրիում և մասնակցել «Գյումրի-Սիան» համաժողովին: Շնորհակալ ենք այն ջերմ ընդունելության համար, որ արժանացավ չինական պատվիրակությունը Գյումրիում: Ընդհանուր առմամբ, հայ-չիանական դարավոր համագործակցությունը նաև շարունակվում է մեր օրերում, ավելին՝ այն թևակոխում է նոր փուլ՝ տարածքային համագործակցության, որը կարող է հիմք հանդիսանալ երկու քաղաքների սոցիալ-տնտեսական, մշակութային և առևտրաարդյունաբերական կապերի զարգացման համար»,- նշեց Վան Շիցայը:

Գյումրու և Սիանի միջև համագործակցության նախահիմք հանդիսացավ 2013 թվականի հուլիսին Գյումրիի և Սիանի միջև ստորագրված բազմակողմանի համագործակցության մասին հուշագիրը, որին հետևեցին արդեն երկու քաղաքների պատվիրակությունների այցերը: 2013 թվականի սեպտեմբերին Սամվել Բալասանյանը ՉԺՀ Սիան քաղաքում մասնակցեց «Եվրասիական տնտեսական ֆորումին», իսկ 2014 թվականի սեպտեմբերին՝ Խաղաղության միջազգային օրվան նվիրված տոնակատարությանը և Մետաքսի ճանապարհի տնտեսական գոտու քաղաքների զարգացմանը նվիրված համաժողովին:

Արմենուհի Մխոյան