Արարատի մարզում մեկնարկում է «Լավագույն մարզական ընտանիք» մրցույթը

ԱՐՏԱՇԱՏ, 5 ՀՈՒՆԻՍԻ, ԱՐՄԵՆՊՐԵՍ: ՀՀ նախագահի մրցանակի համար «Լավագույն մարզական ընտանիք» մրցույթի Արարատի մարզի տարածաշրջանային փուլը կանցկացվի հունիսի 7-12-ը` մարզի չորս քաղաքներում, որին կմասնակցեն մարզի տարբեր տարածաշրջանների 48 թիմեր: Այդ օրերին կորոշվեն չորս տարիքային խմբերի ուժեղագույն ընտանիքները, որոնք կանցնեն մարզային փուլ: «Արմենպրես»-ի թղթակցի հետ զրույցում մարզպետարանի աշխատակազմի մշակույթի եւ սպորտի բաժնի պետ Կարինե Հովհաննիսյանն ասաց, որ թիմերը կմրցեն յոթ մարզաձեւերում` խաղային փոխանցումավազք 30մ եւ 80մ, վարժություն բասկետբոլի գնդակով, պարանի ձգում, խաղային փոխանցումավազք` թենիսի գնդակներով, հեռացատկ եւ հրաձգություն: Յուրաքանչյուր թիմում ընդգրկված են հայրը, մայրը եւ երեխան:

Մարզային փուլը տեղի կունենա հունիսի վերջին տասնօրյակում` Արտաշատի քաղաքային մարզադաշտում, որի ժամանակ յուրաքանչյուր տարածաշրջանից առաջին, երկրորդ եւ երրորդ տեղերը զբաղեցրած 12 ընտանիք հուլիսի երկրորդ կեսին կմասնակցեն Ծաղկաձորում կայանալիք մրցույթի հանրապետական փուլին: Արդեն երկրորդ տարին է, որ հանրապետական փուլին յուրաքանչյուր մարզից մասնակցում է նաեւ մեկական հաշմանդամ ծնող ունեցող ընտանիք:

Անդրադառնալով մասնակիցների աշխուժությանը՝ բաժնի պետն ասաց, որ այս տարի պակասել են նրանց հայտագրումները, սակայն մասնակցել ցանկացող ընտանիքների հետաքրքրությունը բավականին մեծ է: «Շատ եմ կարեւորում նմանատիպ մրցույթների անցկացումը: Դա քաջալերում է, մեր մեջ ամրապնդում առողջ ապրելակերպի գաղափարն ու նպաստում մասնակից ընտանիքների միջեւ կապերի հաստատմանը»,-ասաց նա՝ ավելացնելով, որ մասնակից ընտանիքները լրջորեն են մոտենում մրցույթի անցկացմանը: Նրանք ամիսներ շարունակ պարապում են, կատարելագործում իրենց մարզավիճակն ու մարզական հմտությունները: «Ըստ իս, սա պետք է լինի վարակիչ նաեւ մյուսների համար»,-նկատեց Հովհաննիսյանը:

Նա նշեց, որ ՀՀ սպորտի եւ երիտասարդության հարցերի նախարարության կողմից անցկացվող մրցույթն իր առջեւ խնդիր է դրել բնակչության առողջության ամրապնդումը, առողջ ապրելակերպի ձեւավորման գործում ֆիզիկական կուլտուրայի եւ սպորտի դերի բարձրացումը եւ ակտիվ հանգստի կազմակերպումը: Մրցույթը նպատակ ունի բնակչության շրջանում ֆիզիկական կուլտուրայի եւ սպորտի քարոզչություն` դրա միջոցով նաեւ ամրապնդելով ընտանեկան կապերը, տեղական ինքնակառավարման մարմինների կողմից տարվող ֆիզկուլտուրայի եւ սպորտի ուղղությամբ կատարվող աշխատանքների խորացում, նաեւ սպորտով զբաղվելու համար նպաստավոր պայմանների ստեղծում:

Տարածաշրջանային փուլում առաջին տեղը զբաղեցրած մասնակիցները կարժանանան նախարարության կողմից սահմանված դրամական պարգեւի:

Լիլիթ Մաճկալյան