Շիրակավան համայնքում եկեղեցի է կառուցվում

ԳՅՈՒՄՐԻ, 4 ՀՈՒՆԻՍԻ, ԱՐՄԵՆՊՐԵՍ: Շիրակի մարզի Անիի տարածաշրջանի Շիրակավան համայնքում կառուցվում է եկեղեցի: Շիրակի թեմի առաջնորդ Միքայել եպիսկոպոս Աջապահյանի ձեռամբ հունիսի 4-ին կատարվեց եկեղեցու հիմնարկեքը: Նախ ջրով, ապա գինով լվացվեց 16 գլաքար:

Ինչպես իր խոսքում նշեց թեմակալ առաջնորդը՝ 16 գլաքարերը խորհրդանշում են 12 առաքյալներին, 2 ավետարանիչներին, Պողոս առաքյալին և Գրիգոր Լուսավորչին: Նրանցից յուրաքանչյուրը խորհրդանշում է եկեղեցու հիմքը՝ եկեղեցին հաստատված է այս 16 անձանց վրա: «Եւ ինչպես իրենք էին գլաքարի նման անտաշ, երբ Տերն իրենց վերցրեց և դարձրեց եկեղեցու հիմք, այսպես էլ այս քարերը, դրա համար ոչ թե տաշված քարեր են օծվում և դրվում եկեղեցու հիմքում, այլ գլաքարեր՝ Աստծո կողմից տաշված»,- իր խոսքում նշեց սրբազանը: Քարերը լվանալուց և օծելուց հետո 16 մկրտված այր՝ տարբեր տարիքի, քարերը տեղադրեցին են եկեղեցու հիմքի տարբեր հատվածներում:

Շիրակավան համայնքը երկար տարիներ եկեղեցի չի ունեցել: Համայնքի բնակիչներն իրենց մոմերը վառել ու աղոթել են գյուղի մատուռներում: Գյուղում եկեղեցի կառուցելու նպատակով համայնքապետարանը Շիրակի թեմին հատկացրել է մոտ 1200ք/մ հողատարածք, իսկ եկեղեցին կառուցելու նախաձեռնությունն իրենց վրա են վերցրել ծնունդով շիրակավանցի մոսկվայաբնակ Թավրիզյան եղբայրները:

Ինչպես «Արմենպրես»-ին տեղեկացրեց Շիրակավան համայնքի ղեկավար Մարատ Մկրտչյանը, գյուղը եկեղեցի ունեցել է մինչև Ախուրյանի ջրամբարի կառուցումը, ինչի պատճառով գյուղը 1920 թվականին տեղափոխվել է, բնակիչները՝ վերաբնակեցվել մի փոքր հեռու: Այսպես 17-րդ դարի եկեղեցին հայտնվում է ջրի տակ: Երկար տարիներ, ասում են, որ ջրամբարի տակից եկեղեցու քարերը լույս են տվել: Քարերը տարիներ առաջ դուրս են բերվել ջրից՝ եկեղեցի կառուցելու նպատակով, բայց այդպես էլ տարիներ շարունակ չի հաջողվել կառուցել եկեղեցին՝ մինչ այս նախաձեռնությունը: Հենց այդ նույն քարերը կօգտագործվեն նոր եկեղեցու շինարարության ժամանակ:

Արմենուհի Մխոյան