2 րոպեի ընթերցում
ԳՅՈՒՄՐԻ, 2 ՄԱՅԻՍԻ, ԱՐՄԵՆՊՐԵՍ: «Հատուցում» ծրագրի շրջանակներում այս տարի հանգստանալու կմեկնի 350 մարդ: ART ընկերությունը, «Հատուցում» ծրագրի շրջանակում, անցած 5 տարիների ընթացքում անընդմեջ իրականացրել է ծրագիրը՝ հնարավորություն տալով Շիրակի մարզի ազատամարտիկներին, զոհված ազատամարտիկների հարազատներին հանգստանալու ինչպես Հայաստանում, այնպես էլ Սև ծովի ափին: Սակայն, ի տարբերություն անցած տարիների, այս տարի այդ ծրագրից նաև օգտվելու են տարբեր ոլորտների ներկայացուցիչներ: Նրանցից 100-ը ազատամարտիկ են, մյուսները` մանկավարժներ, բժիշկներ, մարզիկներ, գրադարանավարներ, լրագրողներ, փրկարարներ: ART ընկերությունն անում է ամեն ինչ հանգստացողների առօրյան լիարժեք կազմակերպելու համար: Հանգստի մեկնողները հնարավորություն են ունենում օգտվել ժամանցի վայրերից: Բացի այն, որ այս տարի ծրագրից օգտվողներն ավելի շատացել են, ավելացել է նաև ծրագրին աջակցողների թիվը: «Անցած տարի նախաձեռնությանն աջակցեց Շիրակի մարզպետը, այս տարի նախաձեռնությանը միացել են գործարարներ ԱՄՆ-ից, Շվեդիայից և ՌԴ-ից: Ուրախ եմ սրա համար, քանի որ շատերը հասկացան այս ծրագրի անհրաժեշտության մասին: Այսօր մենք հասկանում ենք, որ կան շատ խնդիրներ, և ով ունի հնարավորություն՝ պետք է գիտակցի ու աջակցի կարիքավորին: Ի դեպ, բացի ազատամարտիկներից, այլ ոլորտների աշխատակիցները ծրագիր ընդգրկվել են հիմնականում բարերարների ընտրությամբ»,- նշեց նախաձեռնության հեղինակ Արտյոմ Թումանյանը:Մայիսի 2-ին Գյումրու «Հոկտեմբեր» կինոթատրոնում հանգստի մեկնողներին ART ընկերության նախագահ Արտյոմ Թումանյանը հանձնեց հավաստագրերը: Մինչ այդ Երկրապահ կամավորականների միության Շիրակի մարզային և Գյումրու կառույցի անունից բոլոր բարերարներին շնորհակալություն հայտնեց ու պատվոգրեր հանձնեց ԵԿՄ Գյումրու կառույցի ղեկավարը:
Արմենուհի Մխոյան