3 րոպեի ընթերցում
ԱՐՏԱՇԱՏ, 1 ՀՈՒՆԻՍԻ, ԱՐՄԵՆՊՐԵՍ: Երեխաների պաշտպանության միջազգային օրվա կապակցությամբ Արարատի մարզկենտրոն Արտաշատում վաղ առավոտից մեկնարկել էին տոնական միջոցառումները: Շառլ Ազնավուրի անվան մշակույթի կենտրոնին հարակից հրապարակում ցուցադրված էին Արտաշատի գեղարվեստի դպրոցի սաների ստեղծագործությունները, իսկ քաղաքային յոթ մանկապարտեզների սաների համար կազմակերպված էր կավճանկարի մրցույթ: Փոքրիկները հանդես եկան երգեցողության եւ պարային համարներով, ելույթ ունեցան նաեւ Արտաշատի Ալեքսանդր Փաշաեւի անվան երաժշտական դպրոցի վոկալ բաժնի սաները, մարզի երգիչ-երգչուհիները, պարային համարներ ներկայացրեցին նաեւ Արտաշատի քաղաքային արտադպրոցական կենտրոնի սաները:
Փոքրիկներին այցելության եկան եւ նրանց տոնը շնորհավորեցին մարզպետ Ռուբիկ Աբրահամյանը եւ քաղաքապետ Գագիկ Մուրադյանը: Ներկա էին նաեւ մարզպետարանի եւ քաղաքապետարանի կրթությհան բաժնի աշխատակիցները: Աբրահամյանն իր խոսքում անհոգ եւ ուրախ մանկություն մաղթեց փոքրիկներին, որպեսզի նրանք միշտ լինեն սիրով ու ջերմությամբ, հոգատարությամբ ու քնքշանքով շրջապատված: «Թող այդ զգայուն ու քնքուշ էակները երբեք մեր ուշադրության պակասը չզգան: Թող նրանք մեծանան ամուր ու կայուն հայկական ընտանիքներում` ստանալով հայեցի դաստիարակություն»,- ընդգծեց նա:
Քաղաքապետ Մուրադյանը շնորհավորեց երեխաներին, նրանց մայրերին, ցանկացավ խաղաղ, բարի ու անհոգ մանկություն: «Ճիշտ է, երեխաները մեր ապագան են, սակայն մեզանից է կախված, թե ինչպես կկերտենք նրանց ապագան. կդաստիարակենք խելացի, ազնիվ քաղաքացի. ուրեմն, Հայաստանը կղեկավարեն խելացի քաղաքացիներ եւ կունենանք ուժեղ քաղաքացիական հասարակություն: Իսկ եթե մենք դա չանենք, ասել է թե` մենք ապագա չունենք»,- ասաց քաղաքապետը: Ողջույնի խոսքով հանդես եկավ նաեւ մշակույթի կենտրոնի սցենարիստ եւ կազմակեպիչ Լիանուշ Աղախանյանը:
Երեխաներին շնորհավորելու, եւ նրանց տոնն անմոռանալի դարձնելու համար հյուր էին եկել նաեւ ծաղրածուներն ու մուլտիպլիկացիոն ֆիլմերի հերոսները, որոնք հանդես եկան լայնածավալ շոու-ծրագրով: Միջոցառման վերջում երեխաներին բաժանվեցին պաղպաղակ եւ քաղցրավենիք:
Արտաշատի «Զանգակ» զբոսայգում վաղ առավոտից անվճար գործեցին կարուսելները: Արտադպրոցական կենտրոնի սաներն այնտեղ նույնպես հանդես եկան համերգային ծրագրով: Մասնակցում էին նաեւ զբոսայգում գտնվող երեխաները, ովքեր ասմունքնեցին, երգեցին: Մինչ ուշ գիշեր այնտեղ կշարունակվեն բազմաբովանդակ միջոցառումները:
Վաղ առավոտից Արարատ, Վեդի եւ Մասիս քաղաքներում նույնպես կազմակերպված էին մանկական միջոցառումներ: Բոլոր քաղաքներում էլ երեխաների հյուր էին եկել մուլտիպլիկացիոն ֆիլմերի հերոսները: Նրանց համար կազմակերպվեցին խաղեր, արտասանությունների մրցույթ: Բաժանեցին պաղպաղակ, քաղցրաբլիթներ: Հրապարակներում հնչեցին մանկական, պատանեկան երգեր:
Հունիսմեկյան միջոցառումներ տեղի ունեցան նաեւ մարզի գրեթե բոլոր գյուղական համայնքներում, որոնք կշարունակվեն մինչեւ ուշ գիշեր:
Լիլիթ Մաճկալյան