Ասլամազյան քույրերի պատկերասրահում կազմակերպվել էր Գյումրու միջազգային բիենալեի արխիվային նմուշների ցուցադրություն

ԳՅՈՒՄՐԻ, 18 ՄԱՅԻՍԻ, ԱՐՄԵՆՊՐԵՍ: «Մարիամ և Երանուհի Ասլամազյան քույրերի» պատկերասրահը մայիսի 18-ին Թանգարանների միջազգային օրվա առթիվ, կազմակերպել էր Գյումրու միջազգային բիենալեի արխիվային նմուշների ցուցադրություն: Հայաստանում դեռևս եզակի ժամանակակից արվեստի բիենալեն առաջին անգամ անցկացվել է դեռ 1996 թվականին՝ Գյումրիում /Արշավախումբ-101/, բայց 1998 թվականին այն անցկացվեց պաշտոնապես, որպես միջազգային բիենալե: Այսօր էլ՝ տարիներ անց, Գյումրիում անցկացվող ժամանակակից արվեստի բիենալեն միջազգային է, սակայն ի տարբերություն առաջին տարիներին անցկացվող ցուցադրությունների, վերջին տարիներին մշակութային այս իրադարձությանն ավելի շատ ներգրավված էին տեղի արվեստագետները, ինչը խոսում է բիենալեի արդյունավետության մասին:

Այս մասին «Արմենպրես»-ի հետ զրույցում նշեց ցուցադրության համադրող Գոհար Սմոյանը: «Գյումրու բիենալեն մեծ ձեռքբերում է ինչպես Գյումրու, այնպես էլ ողջ Հայաստանի համար՝ ոչ միայն այն առումով, որ դրա մասին խոսեցին աշխարհի լավագույն ժամանակակից արվեստագետները, այլ այն առումով, որ տեղի արվեստագետներից շատերն սկսեցին ավելի «ազատ» մտածել: 16 տարի շարունակ Գյումրիում իրականացվող բիենալեն տարածում էր ժամանակակից արվեստը: Այս ընթացքում միայն մեկ անգամ՝ 2014 թվականին, ինչ-ինչ պատճառներով այն չի անցկացվել: Ամեն դեպքում, այս ցուցադրությունը ուղերձ է հասկանալու համար, թե ինչ ունեք, կամ պետք է մեզ այն, թե չէ: Երբ խոսքը ընդհանարպես արվեստի մասին է, դա այլ է, ժամանակակից արվեստը՝ այլ: Այն հաճախ նաև արվեստագետների կողմից դժվար է ընդունվում և ընկալվում: Դա է պատճառը, որ բիենալեն կարողացավ կատարել իր դերը, արդյունքում՝ 2012 թվականին բիենալեին մասնակցում էր գյումրեցի երիտասարդ արվեստագետների առաջին սերունը»,- նշեց Գոհար Սմոյանը:

Ի դեպ, այս ընթացքում Գյումրու ժամանակակից արվեստի բիենալեին մասնակցել են աշխարհահռչակ արվեստագետներ Սարկիս Զաբունյանը, Մարկոս Գրիգորյանը, Գեորգի Վիտիչևսկին, Դավիթ Կատեյանը և այլ հայտնի արվեստագենտներ:

Նույն օրն ավելի ուշ պատկերասրահի բակում կոմիտասյան «Մանրանվագներ»-ը ներկայացվեցին Գյումրու լարային քառյակի կողմից:

Արմենուհի Մխոյան