Հոլանդիայից ներկրված երինջները հարմարվում են Շիրակի բնակլիմայական պայմաններին

ԳՅՈՒՄՐԻ, 15 ՄԱՅԻՍԻ, ԱՐՄԵՆՊՐԵՍ: Հոլանդիայից ներկրված երինջները շարունակում են հարմարվել Շիրակի մարզի բնակլիմայական պայմաններին, ավելին, արդեն սերունդ են տալիս: Երինջները մարզում են ՀՀ գյուղատնտեսության նախարարության կողմից իրականացվող հինգամյա ծրագրի շրջանակում, որը մեկնարկել է 2010-ին: Այս տարի մարզ կներկրվի այնքան գլխաքանակ, որքան հայտ ներկայացվել է՝ մոտ 20 գլուխ՝ 3 ֆերմերային տնտեսության կողմից:

Ներկա պահին մարզում 8 ֆերմերային տնտեսություն են ձեռք բերել այս երինջներից՝ ընդհանուր թվով ավելի քան 120 գլուխ: Շիրակի մարզպետարանի գյուղատնտեսության վարչության պետ Մովսես Մանուկյանը տեղեկացրեց «Արմենպրես»-ին, որ մարզի ֆերմերային տնտեսություններից երինջներ ստանալու առաջարկը վարչությունը ներկայացնում է ՀՀ գյուղատնտեսության նախարարությանը, սակայն «թանկարժեք» անասուններն հենց այնպես ֆերմերին չեն տրվում՝ թանկարժեք երինջների համար պահանջվում է թանկարժեք խնամք ու պայման: «Բոլոր չափորոշիչները պետք է պահպանվեն: Գյուղատնտեսության նախարարությունն ուսումնասիրում է առաջարկ ներկայացրած ֆերմերային տնտեսությունները, դրանց հնարավորությունները: Ի դեպ, այս ցեղատեսակները ոչ միայն արդեն հարմարվել են մեր բնակլիմայական պայմաններին, այլ նաև սերունդ են տալիս»,-նշեց պատասխանատուն:

Այս ցեղատեսակի երինջներն, իրոք, թանկարժեք են՝ 1 երինջի գինը հասնում է մինչեւ 2700 եվրոյի: «Նշեմ, որ այս ցեղատեսակները մեր Կովկասյան գորշից շուրջ երկու անգամ շատ կաթ են տալիս, բայց Կովկասյան գորշը մեր պայմաններին վարժեցված է, իսկ ներկրված երինջները «նուրբ» են, դրանց համար պետք է հատուկ մսուրային եւ արոտային խնամ: Լավ խնամք են պահանջում, բայց արդյունքում լավ էլ վարձահատույց են լինում տիրոջը: Մարզում կան ֆերմերային տնտեսություններ, որոնք արդեն այս ցեղատեսակը բազմացնելով տեղում վաճառում են դրանք»,-ավելացրեց Մովսես Մանուկյանը:

Արմենուհի Մխոյան