Դատարանը հարցաքննեց Հոռոմի խաչմերուկի վթարից տուժողներին

ԳՅՈՒՄՐԻ, 14 ՄԱՅԻՍԻ, ԱՐՄԵՆՊՐԵՍ: Կայացավ Երևան-Գյումրի ավտոճանապարհի Հոռոմ գյուղի խաչմերուկում 2014 թվականի նոյեմբերի 10-ին տեղի ունեցած վթարի գործով հերթական դատական նիստը: Շիրակի մարզի ընդհանուր իրավասության առաջին ատյանի դատարանում մայիսի 14-ին կայացավ վթարի առթիվ հարուցված քրեական գործի դատական նիստը՝ նախագահող, ՇՄ առաջին ատյանի դատավոր Աշոտ Մանուկյանի գլխավորությամբ: Նշենք, որ նախորդ 2 նիստերը չէին կայացել 2 տուժողների և տուժողների 2 իրավահաջորդների բացակայության պատճառով՝ ՀՀ քրեական դատավարության օրենսգրքի 307 և 310 հոդվածների հիմքով: Թեև այս նիստի ժամանակ կրկին ներկա չէին տուժողներից 2-ը և 1 տուժողի իրավահաջորդը, սակայն դատարանը որոշեց նիստն անցկացնել՝ հաշվի առնելով այն հանգամանքը, որ տուժողները հեռախոսով տվել էին իրենց համաձայնությունը՝ նիստերն իրենց բացակայությամբ անցկացնելու վերաբերյալ:

Դատական նիստի ժամանակ պաշտպանի՝ Լիանա Բալյանի կողմից ներկայացվեց արագացված կարգով դատավարություն անցակցնելու մասին միջնորդությունը, որը չբավարարվեց: «Հարգելով տուժողների վիշտը, միջնորդում ենք կիրառել արագացված կարգով դատական նիստ: Դա չի վերաբերում այն բանին, որ Մանվել Վարդանյանը լիովին մեղավոր է, այստեղ իրենց մեղքի բաժիններն ունեն նաև «ԳԱԶելի» վարորդը և պետական մարմինները»,- իր խոսքում նշեց փաստաբանը:

«Այս քրեական գործով անշգուշությամբ մահ է պատճառվել 7 անձի, հետևաբար, արագացված դատական կարգ կիրառելու արդյունքում ամբաստանյալի նկատմամբ կկիրառվի մեղմ պատիժ, ինչը կհակասի պատժի նպատակներին»,- հայտարեց պետմեղադրող Արտյոմ Ավետիսյանը:

Ի դեպ, այս միջնորդության ընդունման դեպքում, պատիժ կսահմանվեր տվյալ հոդվածի նախատեսված պատժաչափի երկու երրորդից ոչ ավելի ժամկետով, ինչն էլ հիմնական պատճառն էր, որ տուժողները և տուժողների իրավահաջորդները դեմ էին միջնորդությանը: Հաշվի առնելով սա, դատավորը որոշում կայացրեց դատական նիստն անցկացնել ընդհանուր կարգով:

Չբավարարվեցին նաև փաստաբանի՝ պետմեղադրողի նկատմամբ ինքնաբացարկ հայտարարելու միջնորդությունը՝ հաշվի առնելով այն, որ դրա համար չկային անհրաժեշտ հիմքեր, իսկ ևս 2 այլ միջնորդություններ՝ այդ թվում դատաավտոտեխնիկական համալիր փորձաքննության և որոշ ապացույցներ անօրինական ճանաչելու մասին, հետաձգվեցին:

Միջնորդություններից հետո, հարցաքննվեցին գործով տուժողներ Զարուհի Հովհաննիսյանը, Հովհաննես Չախոյանը, Էդմոնդ Սիմոնյանը, ինչպես նաև տուժողների իրավահաջորդներ Հրանտ Սիմոնյանը և Մարգարիտա Չախոյանը:Դատական հաջորդ նիստի նշանակվել է մայիսի 15-ին:

Անցյալ տարվա նոյեմբերի 10-ին Հոռոմ գյուղի խաչմերուկում «Իմեքս գրուպ» ՍՊԸ-ի «ԿամԱԶ» ու "Տրանս ակնթարթ" ընկերությանը պատկանող "ԳԱԶել" մակնիշների մեքենաների վթարի հետևանքով մարդատար «ԳԱԶել»-ն այրվել էր, ինչի պատճառով ուղևորներից 7-ը մահացել էին տեղում, ևս 7-ը մարմնական տարբեր աստիճանի վնասվածքներով տեղափոխվել էին Գյումրու բժշկական կենտրոն: «ԿամԱԶ»-ի վարորդ Մանվել Վարդանյանի նկատմամբ հարուցվել էր քրեական գործ՝ ՀՀ քրեական օրենսգրքի 242 հոդվածի 3-րդ մասի հատկանիշներով: Խափանման միջոց էր ընտրվել կալանավորումը:

Արմենուհի Մխոյան