Հանրահայտ արշավորդը մրցաշարերին կմասնակցի Հայոց Ցեղասպանության 100-րդ տարելիցի խորհրդանիշ անմոռուկով
1 րոպեի ընթերցում
ԵՐԵՎԱՆ, 26 ԱՊՐԻԼԻ, ԱՐՄԵՆՊՐԵՍ։ Porsche Mobil 1 Supercup մրցավազքի բազմակի հաղթող, հանրահայտ արշավորդ Ալեքս Ռիբերասը և նրա թիմը առաջիկա մեկ տարին մրցաշարերին կմասնակցեն Հայոց Ցեղասպանության 100-րդ տարելիցի խորհրդանիշ անմոռուկով։ Այս մասին «Արմենպրես»-ին տեղեկացրին Իսպանիայում Հայաստանի դեսպանությունից։ Մտահաղացման հեղինակը և հովանավորը Արման Մայիլյանն է (Բարսելոնա)։ Այս պահին Ալեքսը մասնակցում է Նյուրնբերգի մրցավազքին։
Ապրիլի 24-ին լրացավ Հայոց ցեղասպանության 100-րդ տարելիցը։ Որպես տարելիցի խորհրդանիշ ընտրվել էր անմոռուկը։ «Անմոռուկ» խորհրդանիշը պաշտպանված է հեղինակային իրավունքներով Հայաստանում և արտերկրում: Դրա օգտագործման բացառիկ իրավունքը պատկանում է Հայոց Ցեղասպանության 100-րդ տարելիցի միջոցառումները համակարգող գլխավոր տնօրինությանը: