1 րոպեի ընթերցում
ԵՐԵՎԱՆ, 12 ԴԵԿՏԵՄԲԵՐԻ, ԱՐՄԵՆՊՐԵՍ: Ն.Ս.Օ.Տ.Տ. Արամ Ա. Կաթողիկոսն այցելել է Աբու Դաբիում Հայաստանի դեսպանատուն: Այս մասին «Արմենպրես»-ը տեղեկացավ Կիլիկիո Կաթողիկոսության պաշտոնական կայքից: Դեսպանատան մուտքի մոտ նրան դիմավորել է դեսպան Գեղամ Ղարիբջանյանը և դեսպանատան անձնակազմը: Ավանդական աղ ու հացի օրհնությունից հետո Վեհափառ Հայրապետի այցելության առիթով դեսպանատան այգում տեղի է ունեցել ծառատունկ: Դեսպան Ղարիբջանյանն անդրադարձել է Արամ Ա. Վեհափառի ցուցաբերած զորակցությանը Հայաստանի հզորացմանը ձգտող աշխատանքներում: Վեհափառը ուրախությամբ նշել է, որ դեսպանատունը հայկական հող է Հայաստանից դուրս: Նա դեսպանին է փոխանցել ՀՀ Նախագահ Սերժ Սարգսյանին ուղղված ողջույնները:
Նորին Սրբությունը գոհունակություն է հայտնել Արաբական Միացյալ Էմիրությունների և Քաթարի թեմի ազգային իշխանության և մեր ժողովրդի զավակներին` դեսպանատանն աջակցելու ու օգտակար լինելու համար:
Հովվապետական այցելության շրջանակներում Վեհափառ Հայրապետը հանդիպել է Աբու Դաբիի ազգային վարչության հետ, ապա ներկա է գտնվել վարչության կողմից կազմակերպված ճաշկերույթին:
Ավելի վաղ Կաթողիկոսն այցելել էր Աբու Դաբիում Լիբանանի դեսպանատուն: