Բանակցություններից հետո Լավրովը խոսել է ղարաբաղյան կարգավորման և ՀՀ Մաքսային միությանը միանալու մասին
2 րոպեի ընթերցում
![Բանակցություններից հետո Լավրովը խոսել է ղարաբաղյան կարգավորման և ՀՀ Մաքսային միությանը միանալու մասին](http://armenpress.am/resized/480/static/news/b/2014/08/772158.jpg)
ՍՈՉԻ, 10 ՕԳՈՍՏՈՍԻ, ԱՐՄԵՆՊՐԵՍ: Հայաստանի և Ադրբեջանի նախագահները Սոչիում կայացած հանդիպման ժամանակ պատրաստակամություն են հայտնել շարունակել երկխոսությունը՝ Լեռնային Ղարաբաղի հակամարտության կարգավորման հարցում: Ինչպես հաղորդում է «Արմենպրես»-ը, այս մասին լրագրողների հետ զրույցում հայտարարել է ՌԴ ԱԳ նախարար Սերգեյ Լավրովը: «Հանդիպումն օգտակար է եղել: Նախագահները կրկին բարձր մակարդակով վերահաստատեցին իրենց հանձնառությունը համանախագող երկրների առաջարկած սկզբունքներին, իսկ այդ սկզբունքները կայանում են նրանում, որ հարկավոր է գտնել հակամարտության խաղաղ կարգավորման ուղիներ` հիմնված տարածքային ամբողջականության և ժողովուրդների ինքնորոշման իրավունքը հարգելու սկբունքի վրա»,- ասել է Լավրովը: ՌԴ արտաքին գործերի նախարարը նշել է, որ վերահաստատվել է բարձր մակարդակով երկխոսության շարունակության անհրաժեշտությունը՝ իսկ ՌԴ-ն, որպես համանախագահող երկիր, ամեն կերպ օժանդակելու է դրան:
Լավրովը մանրամասնել է, որ ԼՂ հակամարտության կարգավորման հետ կապված ամենաբարդ հարցերը դեռևս լուծված չեն: Միևնույն ժամանակ, նա ընդգծել է, որ Հայաստանի և Ադրբեջանի նախագահները հայտնել են հակամարտությունը խաղաղ ճանապարհով լուծելու պատրաստակամության մասին:
ՌԴ արտաքին գործերի նախարարը անդրադարձել է նաև Մաքսային միությանը Հայաստանի անդամակցության հարցին՝ ասելով, որ Լեռնային Ղարաբաղի հակամարտությունը չի խանգարելու Մաքսային միությանը Հայաստանի անդամակցությանը: «Հայաստանը Մաքսային միություն է մտնում որպես Հայաստան: Լեռնային Ղարաբաղն այս հարցի հետ ընդհանրապես կապ չունի, ինչպես ոչ մեկ անգամ հայտարարել է Հայաստանի նախագահը»,- հայտարարել է նա:
Տեսանյութը՝ Արմնյուս հեռուստաընկերության