2 րոպեի ընթերցում
ԵՐԵՎԱՆ, 18 ՓԵՏՐՎԱՐԻ, ԱՐՄԵՆՊՐԵՍ: Սիրիայի զինված ընդդիմադիրների մեծամասնությունը հեռացել է Դամասկոսի Յարմուք ճամբարից, որտեղ պաղեստինցի փախստականներ են բնակվում: Ինչպես հաղորդում է «Արմենպրես»-ը` վկայակոչելով արաբական լրատվամիջոցները, զինված ընդդիմադիրները հեռացել են՝ համաձայն պաղեստինյան խմբակցությունների հետ պայմանավորվածության: Նրանք արդեն իսկ համաձայնության են եկել մարդասիրական օգնություն տրամադրելու վերաբերյալ, ինչն ամիսներ շարունակ անհնարին էր արյունալի բախումների պատճառով:
Սիրիական ՍԱՆԱ գործակալությունը տեղեկացնում է, որ Դամասկոսի Ջոբար, Արաբիին, Դումա, Դարիա և Յաբրուդ շրջաններում մեծ թվով զինյալներ են սպանվել, որոնց մեծամասնությունը «Ջաբհաան Նուսրա» և «Լուա ալ Իսլամ» խմբավորումների անդամներ են: Դամասկոսի Ջարամանա արվարձանում փետրվարի 17-ին հրասանդ ընկնելու հետևանքով 2 քաղաքացիներ են զոհվել, և վիրավորվել` ևս 5-ը: Հրասանդն ընկել է Ջարամանայի Թարբա թաղամասի բնակելի տներից մեկի վրա: Բացի մարդկային կորուստներից, վնասվել են մերձակայքում գտնվող տները և մեքենաները:
Սիրիական բանակը հսկողություն է հաստատել Համայի շրջանի Մաան գյուղի վրա և ոչնչացրել զինյալների վերջին հավաքատեղիները: Տեղի ունեցած բախումների ժամանակ տասնյակ զինյալներ են սպանվել և վիրավորվել:
Սիրիայում եռամյա հակամարտության ընթացքում զոհերի թիվը հասել է 120 հազարի, զոհված հայերի թիվը գերազանցել է 70-ը: