2 րոպեի ընթերցում
ԵՐԵՎԱՆ, 4 ՓԵՏՐՎԱՐԻ, ԱՐՄԵՆՊՐԵՍ: Իր տեսակով երիտասարդական նախաձեռնություն հանդիսացող «Ելք չկա» գեղարվեստական լիամետրաժ ֆիլմը փետրվարի 15-ից կլինի Երևանի բոլոր կինոթատրոններում: Քրեական դրամայի պրեմիերան նախատեսված էր հունվարի 31-ի, սակայն այն հետաձգվել էր:
«Արմենպրես»-ին ֆիլմի կազմկոմիտեից տեղեկացրին, որ նախատեսված է ֆիլմի ցուցադրումը նաև ԱՄՆ-ում, Բելգիայում, Հոլանդիայում, Ղազախստանում և Ռուսաստանում:
«Ելք չկա»-ն ֆիլմի պրոդյուսեր, RecTime production ընկերության հիմնադիրԿամո Ունանյանի առաջին կինոփորձն է: Քրեական դրամայի նկարահանումները մեկնարկել էին օգոստոսի վերջին և ավարտվել հոկտեմբերին: «Ելք չկա»-ն կառանձնանա նաև այն բանով, որ կոմպոզիտոր Էդմոնդ Մակարյանի հեղինակած երաժշտությունը` ֆիլմի soundtrack-ը, հնչում է Հայաստանի պետական երիտասարդական նվագախմբի կատարմամբ:
Նվագախումբը կատարել է ֆիլմի երաժշտությունը «Արամ Խաչատրյան» համերգասրահում: Ֆիլմի նկարահանումները կատարվել են Հայաստանում և Վրաստանում: Գեղարվեստական ֆիլմում անդրադարձ է կատարվում արդիական խնդիրների` սիրուն, ընկերությանը, դավաճանությանը:
Իննսուն րոպե տևողությամբ կինոժապավենում, բացի սկսնակ դերասաններից, նկարահանվել են անվանի արտիստներ Արտաշես Ալեքսանյանը, Արմեն Մարությանը: Կինոժապավենի ռեժիսորն է Վահե Սայանը, սցենարի հեղինակը՝ Հարություն Ղուկասյանը: Ֆիլմի երկրրոդ` ռեփային soundtrack-ը կկատարի Նարեկ Պետրոսյանը: