1 րոպեի ընթերցում
ԵՐԵՎԱՆ, 29 ՀՈւՆՎԱՐԻ, ԱՐՄԵՆՊՐԵՍ: Հոմսի բնակչությանն առաջիկա 24 ժամվա ընթացքում մարդասիրական օգնություն կտրամադրեն: Ինչպես հաղորդում է «Արմենպրես»-ը, վկայակոչելով սիրիական ՍԱՆԱ գործակալությունը, այս մասին հունվարի 29-ին հայտարարել է Հոմսի քաղաքապետ Թալալ ալ Բարրազին: Նրա խոսքով` բժիշկները, Սիրիայի կարմիր Մահիկի կազմակերպության անդամները ամեն վայրկյան պատրաստ են անցնել աշխատանքի, սակայն սպասում են զինված խմբավորումների հետ բանակցությունների արդյունքներին:
Քաղաքապետը նշել է, որ Հոմսի հին քաղաքից բոլոր ցանկացող կանանց և երեխաներին դուրս հանելը միջսիրիական բանակցությունների արդյունք է: Նա նաև ավելացրել է, որ անհրաժեշտ է նաև անվտանգ միջանցք ստեղծել 73 քրիստոնյաների համար, որոք չեն կարողանում հեռանալ Բուսթան ադ Դիուան մենաստանից:
Տեղեկություններ կան, որ Հոմս է հասել որպես մարդասիրական օգնություն ուղարկված մթերքը, որը կարող են մեկ ամսվա ընթացքում բավականացնել 2,5 հազար բնակիչների:
Ժնևում մեկնարկած միջսիրիական բանակցությունների ընթացքում համաձայնության են եկել Հոմսի, մասնավորպես Ադրայի, ալ Ֆուայի շրջաններին մարդասիրական օգնություն տրամադրելու և այնտեղից կանանց և երեխաներին տարհանելու մասին: