1 րոպեի ընթերցում
ԵՐԵՎԱՆ, 20 ՀՈՒՆՎԱՐԻ, ԱՐՄԵՆՊՐԵՍ: Շարունակվող պայքարում Սիրիայի պարտություն կրելը կնշանակի ողջ Մերձավոր Արևելքում քաոսի տարածում: Ինչպես հաղորդում է «Արմենպրես»-ը՝ վկայակոչելով սիրիական ՍԱՆԱ գորածակալությունը, այս մասին հունվարի 20-ին նշել է Սիրիայի Նախագահ Բաշար ալ Ասադը` «Ֆրանս Պրես» գործակալությանը տված հարցազրույցի ժամանակ՝ ավելացնելով, որ երբ պաշտպանում ես քո երկիրը` միակ տարբերակը հաղթելն է:
«Սա միայն Սիրիայի պայքարը չէ: Այն համակարգի դեմ ուղղված ըմբոստացում կամ հեղափոխություն չէ, որ կոչ է անում ժողովրդավարության և ազատության: Ազգային հեղափոխությունը չի կարող երեք տարվա ընթացքում միայն ձախողում ունենալ: Բացի այդ, ազգային հեղափոխությունը չի կարող ունենալ ծրագիր, որը թելադրում են դրսից»,- նշել է Ասադը:
Նա նաև նշել է, որ Սիրիայի ընդդիմությունը ստեղծվել է օտարազգի հատուկ ծառայությունների կողմից: Ասադը բացառել է ընդդիմության ներկայացուցիչների ընդգրկումը երկրի իշխանությունների մեջ: Նա հարցադրում է արել, թե ինչպես կարող է Սիրիայի կառավարության անդամն իր պարտականությունները կատարել դրսից: