Ամանորին փրկարարներն ստացել են սառած բանալիների, վնասված ջրագծերի, միայնակ տարեցների ցրտահարության ահազանգեր
3 րոպեի ընթերցում
![Ամանորին փրկարարներն ստացել են սառած բանալիների, վնասված ջրագծերի, միայնակ տարեցների ցրտահարության ահազանգեր](http://armenpress.am/resized/480/static/news/b/2014/01/745771.jpg)
ԵՐԵՎԱՆ, 10 ՀՈՒՆՎԱՐԻ, ԱՐՄԵՆՊՐԵՍ: Ամանորի տոներին` դեկտեմբերի 31-ից հունվարի 8-ն ընկած ժամանակահատվածում գրանցված արտակարգ իրավիճակների մեծ մասը պայմանավորված է եղել կենցաղային խնդիրներով, որոնց մեծ մասը բաժին էր ընկնում ջրագծերի և ջրատար խողովակների վթարներին: Հունվարի 10-ին հրավիրված ասուլիսոմ Արտակարգ իրավիճակների նախարարության ճգնաժամային կառավարման կենտրոնի պետ, փրկարար ծառայության գնդապետ Հովհաննես Խանգելդյանը հայտնեց, որ նշված ժամանակահատվածում հանրապետությունում գրանցվել է 277 ահազանդ, որոնցից 105-ը հրդեհներ էին, 125-ը` կենցաղային բնույթի ահազանգեր:
« Հանրապետությունում ցածր ջերմաստիճանի պատճառով մի շարք բնակարաններում, և հիմնականում այն բնակարաններում, որտեղ տան տերերը բացակայում էին, գրանցվեց ջրագծերի վնասում, որը հանգեցնում էր արտահոսք դեպի ստորին բնակարաններ: Մենք համատիրության և ոստիկանության աշխատակիցների հետ արձագանքել ենք անհանգստացնող խնդիրներին և վնասներն ու հետևանքները վերացվել են»,- «Արմենպրես»-ի փոխանցմամբ` տեղեկացրեց Խանգելդյանը` հավելելով, որ ջրագծերի և ջրատար խողովակներին պատահարների թիվը հանրապետությունում հասել է 66-ի:
Համեմատելով 2013 թ. նույն ժամանակահատվածի հետ նա նշեց, որ արտակարգ պատահարներ թիվը հանրապետությունում 2014-ի տարեսկզբին աճել է 53-ով: Հրդեհների թիվը 7-ն է, որոնցից ամենախոշորը գրանցվել է հունվարի 1-ի գիշերը ժամը 1:00-ի սահմաններում մայրաքաղաքի Հրազդանի կիրճում գտնվող խոշոր ռեստորանային համալիրներից մեկում: Հրդեհը գնահատվել է որպես երկրորդ բարդության, դեպքի վայր մեկնել են մարտական հաշվարկներ, հրդեհի մարմանը ներկա են եղել փրկարար ծառայության ղեկավարությունը, սեղմ ժամկետներում մեծ ծավալի հրդեհը մարվել է: Պատճառը պարզ կդառնա միայն համապատասխան փորձագիտական եզրակացությունից հետո:
Որպես դրական միտում ԱԻ նախարարության ճգնաժամային կառավարման կենտրոնի պետը մատնանշեց ճանապապարհատրանսպորտային պատահարները, որոնք նախորդ տարվա համեմատ 20-ով նվազել են: Փրկարարներին հաջողվել է կանխել ինքնասպանության երկու փորձ:
Նշված ժամանկահատվածում ցրտահարությունից մահացել է 5 մարդ: Խանգելդյանի խոսքով` ցրտահարվածների մեծ մասը միայնակ տարեցներ են եղել:
Ամփոփելով տոնական օրերին արտակարգ պատահարների ստեղծված պատկերը` մասնագետը շեշտեց, որ հիմնական խնդիրը կոմունալ-կենցաղայի ահազանգերն էին:
«Հաճախ եղել են դեպքեր, երբ դռան բանալիները սառչելու հետևանքով կոտրվել են»,- նշեց Խանգելդյանը` ավելացնելով, որ Շիրակի մարզում մեկ քաղաքացի մահացել է ինքնաշեն գազի կաթսայի պայթյունի պատճառով:
Փորձագետը նշեց, որ ՀՀ բոլոր միջպետական և միջհամայնքային ավտոճանապարհները հունվարի 10-ի ժամը 11:30-ի դրությամբ հիմնականում անցանելի են: Միջպետական ավտոճանապարհի Երևան-Սևան ճանապարհահատվածի 10-16 կմ-ում մառախուղ և մերկասառույց է:
Առաջիկա օրերին ջերմաստիճանի բարձրացումը հանրապետությունում աննշան կլինի: