2 րոպեի ընթերցում
ԵՐԵՎԱՆ, 8 ՀՈւՆՎԱՐԻ, ԱՐՄԵՆՊՐԵՍ: ՄԱԿ-ի փախստականների հարցերով զբաղվող գրասենյակից ստացված տվյալների համաձայն՝ Սիրիայում 2011թ.-ի մարտ ամսից ի վեր փախստականների թիվը գերազանցել է 2.3 միլիոնը: Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, դա համարվել է ժամանակակից պատմության մեջ մարդասիրական ամենամեծ ճգնաժամներից մեկը: ՄԱԿ-ի կանխատեսումներով` 2014թ.-ին փախստականների թիվը կգերազանցի 4 միլիոնը:
ՄԱԿ-ի փախստականների հարցերով գլխավոր քարտուղարի տեղակալ Վալերի Ամոսը նշել է, որ 2014թ.-ի ընթացքում Սիրիայի քաղաքացիների 75 տոկոսն օգնության կարիք է ունենալու: Մարդասիրական օգնությունների շրջանակում 4.2 միլիարդ դոլարը կբաժանվի սիրիացի փախստականներով առավել բնակցեված երկրներում: Համաձայն դրա՝ հարևան երկրներից Լիբանանին, որտեղ այժմ սիրիացի փախստականներն ամենամեծ թիվն են կազմում, կտրամադրվի 1.7 միլիարդ դոլար փախստականներին օգնություն տրամադրելու համար: Այնուհետև Հորդանանին՝ 1.2 միլիարդ դոլար, Իրաքին՝ 552 միլիոն դոլար, Թուրքիային՝ 522 միլիոն դոլար, իսկ Եգիպտոսին՝ 168.8 միլիոն դոլար: Հորդանանում 2013թ.-ին սիրիացի փախստականների թիվը կազմել է 553 հազար, Լիբանանում՝ 824 հազար, Թուրքիայում՝ 539 հազար, Եգիպտոսում 127 հազար սիրիացի:
2011թ.-ի մարտից ի վեր սիրիական հակամարտության ընթացքում զոհերի թիվը գերազանցել է 120 հազարը: