1 րոպեի ընթերցում
ԵՐԵՎԱՆ, 23 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանում շրջանառության մեջ դրված նոր հսկիչ դրամարկղային մեքենաների բարձր արժեքը պայմանավորված է դրանց որակով: Հոկտեմբերի 23-ին Ազգային ժողովում հարցուպատասխանի ժամանակ այս մասին նշեց ՀՀ վարչապետ Տիգրան Սարգսյանը` պատասխանելով անկախ պատգամավոր Խաչատուր Քոքոբելյանի հարցին: «Դրանք բազմաֆունկցիոնալ հսկիչ դրամարկղային մեքենաներ են, որոնք օնլայն ռեժիմով պետական եկամուտների կոմիտեի կենտրոնական սերվերի հետ կապ հաստատելու և բազում այլ ֆունկցիաներ են ներառում, իսկ դա լրացուցիչ նոր ծառայություններ է ենթադրում: Նոր մեքենաները բոլոր հաշվարկները կարողանում են իրականացնելծրագրային ձևով, ունեն հզոր հիշողություն. սա առաջադեմ համակարգ է»,- «Արմենպրես»-ի հաղորդմամբ՝ շեշտեց նա:
Վարչապետի խոսքով՝ առաջին փուլում նոր մեքենաների սպառողները խոշոր ձեռնարկություններն են, և հենց դրանով է պայմանավորված բարձր արժեքը. արդյունքում` կառաջանան խնայողություններ, որոնք կուղղվեն փոքր և միջին ձեռնարկությունների կողմից ՀԴՄ-ների ձեռքբերման սուբսիդավորմանը: