Մեր միակ նպատակը ՄՄ-ի և ԵՄ-ի հետ համագործակցության արդյունավետ համադրումն է. Տիգրան Սարգսյան
1 րոպեի ընթերցում
ԵՐԵՎԱՆ, 23 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանը միշտ որպես փոխլրացնող է դիտարկելԵվրոպական Միության և Մաքսային միության հետ հարաբերությունները: Այս մասին Ազգային ժողովում կառավարության հետ հարց ու պատասխանի ժամանակ հայտարարեց ՀՀ վարչապետ Տիգրան Սարգսյանը՝ պատասխանելով անկախ պատգամավոր Խաչատուր Քոքոբելյանի հարցին: «Մենք երբևիցէ չենք ասել, որ փոխլրացնող են ԵՄ-ի և ՄՄ-ի հետ կնքվող փաստաթղթերը, այլ ասել ենք, որ այդ քաղաքական գործընթացները մենք դիտարկում ենք որպես փոխլրացնող»,- «Արմենպրես»-ի հաղորդմամբ` նշեց նա:
Նրա խոսքով`այդ փաստաթղթերում կարող են լինել կետեր, որոնք միմյանց հետ հակասության մեջ կմտնեն: «Այստեղ խնդիրն այն է, որ բանակցային գործընթացի միջոցով մենք պետք է կարողանանք վերացնել այդ խնդիրները»,- ասաց Տիգրան Սարգսյանը՝ հավելելով, որ Հայաստանի միակ նպատակը Մաքսային միության և Եվրամիության հետ համագործակցության արդյունավետ համատեղումն է:
ՀՀ վարչապետն ընդգծեց, որ Հայաստանը Մաքսային միությանը միանալու քաղաքական որոշում է կայացրել և չի կարող որևէ փաստաթուղթ ստորագրել, որը կհակասի այդ կառույցին Հայաստանի ինտեգրման գործընթացին: