1 րոպեի ընթերցում
ԵՐԵՎԱՆ, 10 ԱՊՐԻԼԻ, ԱՐՄԵՆՊՐԵՍ: Զինյալները կրկին սկսել են ռումբեր նետել Դամասկոսի թաղամասերի ուղղությամբ: Ինչպես հաղորդում է «Արմենպրես»-ը` վկայակոչելով սիրիական ՍԱՆԱ գործակալությունը, երկու ռումբ ընկել է Դամասկոսի Քաֆրսուսա բնակելի թաղամասում, որի հետեւանքով մեկ մարդ զոհվել է, եւս երկուսը` վիրավորվել: Բացի մարդկային վնասներից մոտակայքում կայանված մեքենաները եւս նյութական վնասներ են կրել: Մեկ այլ ռումբ ընկել է Թահրիր հրապարակի մոտ Բաղդադի փողոցում, որի հետեւանքով մեծ հրդեհ է բռնկվել:
Բախումները զինյալների դեմ շարունակվում են նաեւ Հոմսի շրջանում: Ջոբ Զարիկ եւ Թել Բարիդջ գյուղում տեղի ունեցած բախումների հետեւանքով զինյալներ են սպանվել:
«Ալ Ջազիրա»-ն տեղեկացնում է, որ սիրիացի փախստականների թիվը հասել է մեկ միլիոն երեք հարյուր հազարի: Կայքի տեղեկացմամբ` կառավարական ուժերը ռմբակոծում են մայրաքաղաք Դամասկոսի շրջանները:
ՄԱԿ-ի տվյալներով` Սիրիայում արդեն երկու տարի շարունակվող բախումների հետեւանքով զոհերի թիվը գերազանցում է 70 հազարը, այդ թվում` զոհված հայերի թիվը գերազանցում է չորս տասնյակը: