«Շիրակ» օդանավակայանում կբարելավվի հաշմանդամություն ունեցող մարդկանց տրամադրվող ծառայությունների որակը
2 րոպեի ընթերցում
ԳՅՈՒՄՐԻ, 26 ՓԵՏՐՎԱՐԻ, ԱՐՄԵՆՊՐԵՍ: Գյումրու «Շիրակ» օդանավակայանում կբարելավվի հաշմանդամություն ունեցող մարդկանց տրամադրվող ծառայությունների որակը: Այդ նպատակով «Օգնենք միմյանց» ծրագրի շրջանակում կանցկացվեն սեմինար-պարապմունքեր: Օդանավակայանում սպասարկող բաժնի աշխատակազմը եւ օդանավի անձնակազմը կանցնի հաշմանդամություն ունեցող ուղեւորների սպասարկման վերապատրաստում: Նպատակ կա նաեւ օդանավակայանի մուտքի մոտ հատկացնել հատուկ տարածք անվասայլակների համար:
Ծրագիրն իրականացվելու է «Ագաթ» հատուկ կարիքներով կանանց կենտրոնի կողմից՝ «Բաց հասարակություն ինստիտուտի օժանդակության հիմնադրամ»-ի հայաստանյան մասնաճյուղի եւ Նիդեռլանդների Թագավորության ֆինանսավորմամբ:
Ինչպես «Արմենպրես»-ի թղթակցին տեղեկացրեց ծրագրի պատասխանատու, «Ագաթ» հատուկ կարիքներով կանանց կենտրոնի ղեկավար Կարինե Գրիգորյանը, «Շիրակ» օդանավակայանի ղեկավարության հետ արդեն ստորագրվել է փոխհամագործակցության հուշագիր, եւ առաջիկա օրերի ընթացքում պարապմունքներ կմեկնարկեն
Ծրագրի շրջանակներում արդեն տպագրվել են «Օդանավակայանում հաշմանդամություն ունեցող ուղեւորներին մատուցվող ծառայությունների ուղեցույց» եւ «Առաջին անհրաժեշտության ժեստեր» գրքույկները: «Սեփական փորձից գիտեմ շատ օդանավակայաններում առկա այս խնդրի մասին: Վեց տարի առաջ դժվարություններից շատ էի նեղվում, հիմա արդեն սովորել եմ, բայց հուսով եմ, որ այս ծրագիրը կօգնի զարգացնել «Շիրակ» օդանավակայանի գրանցման, ուղեւորների սպասարկման, անձնագրերի զննման բաժիների աշխատակիցների կարողությունները՝ ուղղված հաշմանդամություն ունեցող ուղեւորների պատշաճ սպասարկմանը: Սրանով նաեւ Շիրակի մարզում բնակվող հաշմանդամություն ունեցող մարդկանց համար կստեղծենք բարենպաստ պայմաններ օդանավակայանի ծառակյությունից օգտվելու համար, ինչն ավելի մատչելի եւ հարմար է, քան մեկնել «Զվարթնոց»«,-նշեց Կարինե Գրիգորյանը: