2 րոպեի ընթերցում
ԵՐԵՎԱՆ, 20 ՓԵՏՐՎԱՐԻ, ԱՐՄԵՆՊՐԵՍ: Դամասկոսի մոտակայքում գնտվող Դարիա, Բաբիլա գյուղերում թեժ մարտեր են ընթանում: Զինյալների հետ բախումների հետեւանքով կառավարական ուժերը թաքստոցներ են հայտնաբերել եւ ոչնչացրել, բացի դրանից, մեծ թվով զինյալներ են սպանվել եւ վիրավորվել: Ինչպես հաղորդում է «Արմենպրես»-ը` վկայակոչելով սիրիական ՍԱՆԱ գործակալությունը, պայքարը շարունակվել է նաեւ Զամալքա եւ Արաբին գյուղերում, որտեղ «Լիուա ալ Իսլամ» ահաբեկչական խմբավորման անդամներ են սպանվել:
Զամալքայի կամրջի մոտակայքում ոչնչացվել են նրանց պատկանող մեքենաները: Զինյալներն ականապատ մեքենա են պայթեցրել Դամասկոսի Ժդիյդե ալ Ֆադլ գյուղում, որի հետեւանքով հինգ մարդ է վիրավորվել: Մեկ այլ դեպք տեղի է ունեցել Դամասկոսի մանկական հիվանդանոցի մոտակայքում, որտեղ երկու հրթիռ է ընկել, բարեբախտաբար մարդկային զոհեր չկան:
Մեկ այլ արաբական աղբյուր տեղեկացնում է, որ փետրվարի 19-ին մի քանի ռումբեր են պայթել Դամասկոսի նախագահական նստավայրի մոտակայքում: Շինությունը նյութական վնասներ է կրել, սակայն դեռ տեղեկություն չի հաղորդվում տուժածների վերաբերյալ: Պաշտոնական Դամասկոսը, սակայն, այդ մասին, ոչինչ չի հրապարակել:
«Ալ Ջազիրա»-ի տեղեկացմամբ, փետրվարի 19-ին Հալեպի Ջաբալ Պեդրո թաղամասում ընկած հրթիռը պատճառ է դարձել տասնյակ զոհերի: Սիրիայում մեկ օրվա ընթացքում 159 մարդ է զոհվել, մեծամասամբ` Հալեպում եւ Դամասկոսում:
ՄԱԿ-ի տվյալներով Սիրիայում շուրջ 23 ամիս շարունակվող բախումների հետեւանքով զոհերի թիվը հասել է շուրջ 70 հազարի, այդ թվում` զոհված հայերի թիվը գերազանցում է չորս տասնյակը: