Սիրիայի տարբեր շրջաններում տասնյակ զինյալներ են սպանվել

ԵՐԵՎԱՆ, 21 ՀՈւՆՎԱՐԻ, ԱՐՄԵՆՊՐԵՍ: Հալեպում եւ շրջակա գյուղերում շարունակվում է պայքարը զինված խմբավորումների դեմ: Ինչպես հաղորդում է«Արմենպրես»-ը` վկայակոչելով սիրիական ՍԱՆԱ գործակալությունը, Շեյխ Նաջար թաղամասում կառավարական ուժերը ոչնչացրել են զինյալներին պատկանող զենքերով լի 4 մեքենաներ: Զինյալների թաքստոցներ են հայտնաբերվել Բաբ ան Նեյրաբ, Բանի Զեյդ, Օմարիա թաղամսերում, որտեղ մեծ թվով զինյալներ են ոչնչացվել:

Պայքարը շարունակվում է նաեւ Դամասկոսի գյուղերում: Մլեհա գյուղում բախումների ժամանակ սպանվել է զինված խմբավորման ղեկավար Արեֆ Մուտարը: Ռազմական գործողությունների շրջան է շարունակում մնալ Արեւելյան Ղուտան, որտեղ գտնվում են ագարականեր եւ պլանտացիաներ: Բախումները հիմնականում տեղի են ունենում Հարասթայի, Հուջեյրայի եւ Զիյաբիայի սուննիներով բնակեցված գյուղերում, որտեղ տասնյակ զինյալներ են սպանվել:

Ընդդիմադիր աղբյուրները տեղեկացնում են, որ Սիրիայի տարածքում հունվարի 20-ին 122 մարդ է զոհվել: Կայքի տեղեկացմամբ` կառավարական ուժերը ռազմական ուղղաթիռներով ռմբակոծել են Դամասկոսի գյուղերը:

ՄԱԿ-ի տվյալներով Սիրիայում շուրջ 22 ամիս շարունակվող բախումների հետեւանքով ավելի քան 60 հազար մարդ է զոհվել: