Սիրիական բոլոր համալսարանները դադարեցրել են դասընթացները` ի հիշատակ Հալեպում զոհված ուսանողների

ԵՐԵՎԱՆ, 16 ՀՈւՆՎԱՐԻ, ԱՐՄԵՆՊՐԵՍ: Սիրիայի նախագահ Բաշար ալ Ասադը հրաման է արձակել հնարավոր կերպով արագ վերականգնել Հալեպի համալսարանի պայթյունի հետեւանքով ավերված տարածքները: Այս մասին նշել է Սիրիայի կրթության նախարար Մուհամմադ Յահյայի Մաալան:Ինչպես հաղորդում է«Արմենպրես»-ը` վկայակոչելով սիրիական ՍԱՆԱ գործակալությունը, կվերականգնվեն դասընթացները եւ քննությունները, որոնք դադարեցվել են ահաբեկիչների կողմից իրականացված հանցագործությունների հետեւանքով:

Նախարարի խոսքով, հունվարի 16-ին նաեւ որոշում է ընդունվել դադարեցնել սիրիական բոլոր համալսարանների դասընթացները եւ քննությունները` ի հիշատակ Հալեպի համալսարանի զոհված ուսանողների:

Հալեպի համալսարանի ճարտարագիտության եւ արվեստի ֆակուլտետների, ինչպես նաեւ հանրակացարանի մեկ մասնաշենքի մոտակայում երկու ուժգին պայթյուններ են տեղի ունեցել: Ստացված տեղեկությունների համաձայն` 83-85 մարդ զոհվել է եւ վիրավորվել` ավելի քան 160 մարդ: