2 րոպեի ընթերցում
ԵՐԵՎԱՆ, 25 ԴԵԿՏԵՄԲԵՐԻ, ԱՐՄԵՆՊՐԵՍ: Սիրիայում ընդդիմադիր զինյալները Իդլեբի շրջանում հարձակվել են չորս անդամներից բաղկացած ընտանիքի վրա եւ սպանել բոլորին: Ինչպես հաղորդում է «Արմենպրես»-ը` վկայակոչելով սիրիական ՍԱՆԱ գործակալությունը, միջադեպը տեղի է ունեցել Մուրք գյուղի ճանապարհին մեքենայի մեջ: Բացի այդ, Մուրք գյուղում բախումներ են տեղի ունեցել եւ մեծ թվով զինյալների են ոչնչացվել:
Դամասկոսի Ջարամանա թաղամասում բախումներ են տեղի ունեցել գլխավոր փողոցի սկզբնամասում, որի հետեւանքով զոհվել է Ջարամանայի անվտանգության ծառայության ղեկավարը եւ վիրավորվել են եւս չորս աշխատակիցներ: Բախումները շատ կարճ են տեւել, որից հետո փակվել է գլխավոր փողոցը:
Նույն օրը Դամասկոսի Ռուքն ադ Դին շրջանում` Սալահ ադ Դին փողոցում, ականապատ մեքենա է պայթել: Տեղի ունեցած պայթյունի հետեւանքով զոհեր եւ վիրավորներ կան, որոնց թիվը դեռեւս ճշտվում է:
Բախումներ են տեղի ունեցել նաեւ Համայի շրջանում: Թել Կուրտուլ գյուղում բախումների արդյունքում մեծ թվով զինյալներ են սպանվել:
«Ալ Ջազիրա»-ն տեղեկացնում է, որ դեկտեմբերի 24-ին Սիրիայի տարածքում, մասնավորապես Դամասկոսում, Հալեպում, Հոմսի եւ Իդլեբի շրջաններում 160 մարդ է զոհվել: Կայքի տեղեկացմամբ ընդդիմադիրները Հալեպի մոտակայքում փորձում են վերահսկողություն հաստատել ռազմական օդանավակայանի, ռազմաբազաների վրա, սակայն դժվարությունների են բախվում կառավարական ուժերի հետ:
Սիրիայում շուրջ 21 ամիս շարունակվող բախումների հետեւանքով զոհվել է մոտավորապես 40 հազար մարդ: