Երեւանում լրատվամիջոցների թիմերի մասնակցությամբ կանցկացվի ֆուտբոլային մրցաշար

ԵՐԵՎԱՆ, 15 ՆՈՅԵՄԲԵՐԻ, ԱՐՄԵՆՊՐԵՍ: «Ֆուտբոլը` հանուն հավասար հնարավորությունների» ֆուտբոլային 6-րդ մրցաշարը նախատեսված զանգվածային լրատվամիջոցների թիմերի համար կմեկնարկի հաշմանդամների միջազգային օրը` դեկտեմբերի 3-ին: Ինչպես «Արմենպրես»-ին տեղեկացրեց «Հույսի կամուրջ» հասարակական կազմակերպության Հաշմանդամություն ունեցող անձանց շահերի պաշտպանության պատասխանատու Զարուհի Բաթոյանը, մրցաշարի նպատակը հաշմանդամություն ունեցող մարդկանց համար հավասար հնարավորությունների ապահովման գաղափարը քարոզելն է:

Մրցաշարին կարող են մասնակցել լրատվամիջոցների սիրողական ֆուտբոլային թիմեր: Յուրաքանչյուր լրատվամիջոց կարող է ներկայանալ մեկ թիմով: Այն ԶԼՄ-ները, որոնք հնարավորություն չունեն սեփական ուժերով թիմ ստեղծել, կարող են միանալ այլ լրատվամիջոցների:

Հայաստանում ապրում է հաշմանդամություն ունեցող ավելի քան 180.000 մարդ, ովքեր զրկված են հասարակական կյանքին լիարժեք մասնակցելու հնարավորությունից: Պատճառներից մեկը հասարակության անտեղյակությունն է խնդրին:

Հենց այս հանգամանքն է պատճառ դարձել, որ «Հույսի կամուրջ» հասարակական կազմակերպությունը, որը զբաղվում է հաշմանդամություն ունեցող երեխաների եւ երիտասարդների հիմնախնդիրներով, արդեն 6-րդ անգամ կազմակերպում է «Ֆուտբոլը` հանուն հավասար հնարավորությունների» ֆուտբոլի մրցաշարը, որին մասնակցում են լրագրողները: Ամեն տարի մինի ֆուտբոլի մրցաշարին մասնակցում է 8-10 լրատվական թիմ, ովքեր մրցաշարին զուգահեռ լուսաբանում են նաեւ հաշմանդամության խնդիրը: Մրցաշարին մասնակցելու հայտերն ընդունվում են մինչեւ 2012 թվականի նոյեմբերի 27-ը:

Նախաձեռնությունն իրականացնում են «Հույսի կամուրջ» եւ «Առաքելություն Արեւելք» կազմակերպությունները` Հայաստանի ֆուտբոլի ֆեդերացիայի աջակցությամբ. բոլորը խաղերն անշահախնդրորեն սպասարկում են բարձրակարգ մրցավարները: Ֆինանսական աջակցությունն ապահովում է Դանիայի միջազգային զարգացման գործակալությունը: Մրցաշարը կանցկացվի «Միկա» մարզահամալիրում: