Մոսկվայի «Սպարտակ»-ի երկրպագուները Ստամբուլում կպարզեն Հայաստանի և Արցախի դրոշները

ԵՐԵՎԱՆ, 23 ՕԳՈՍՏՈՍԻ, ԱՐՄԵՆՊՐԵՍ: Թուրք հաքերները շարունակում են գրոհել Մոսկվայի «Սպարտակ»-ի պաշտոնական կայքը, որի առաջին էջում տեղադրվում է Քեմալ Աթաթուրքի նկարը: Ինչպես հաղորդում է «Արմենպրես»-ը՝ «Սպարտակի» և թուրքական «Ֆեներբախչե»-ի (2:1) միջև կայացած Չեմպիոնների լիգայի որակավորման փուլի հանդիպման ժամանակ ռուս երկրպագուներն այրել էին աթաթուրքի նկարը: «Անմիջապես ներողություն խնդրեք թուրք ժողովրդից: ՖԻՖԱ-ն այն անտեսում է, մենք հանցագործությունն անպատիժ չենք թողնում»,- գրվել է մոսկովյան կայքում՝ Աթաթուրքի նկարի տակ:

Ինչպես հաղորդում է Ռուսաստանում հայկական ինֆորմացիոն կենտրոնը` «Еркрамас»-ը, «Սպարտակի» երկրպագուները մտադիր չեն բավարարել թուրք հաքերների պահանջները և ներողության փոխարեն պատասխան խաղին պատրաստվում են Ստամբուլում պարզել Հայաստանի ու Արցախի դրոշները, ինչպես նաև «Թուրքիա, ճանաչի'ր ցեղասպանությունը» և «Թուրքիա, վերադարձրու' հայկական հողերը» գրառումները: Այս մասին մոսկովյան ակումբի երկրպագուները հայտարարել են «Սպարտակ»-ի Facebook-ի պաշտոնական էջում:

«Չնայած ձեռնարկված միջոցներին` կայքի վրա գրոհները շարունակվում են: Դրա հետ կապված մենք ստիպված էինք ժամանակավորապես դադարեցնել կայքի աշխատանքը»,- նշվել է «Սպարտակ»-ի մամլո ծառայության տարածած հաղորդագրության մեջ:

«Ֆեներբախչե»-«Սպարտակ» հանդիպումը կկայանա օգոստոսի 29-ին: