2 րոպեի ընթերցում
ԵՐԵՎԱՆ, 14 ՕԳՈՍՏՈՍ, ԱՐՄԵՆՊՐԵՍ: Բելառուսի ընտրանին օգոստոսի 15-ին կայանալիք հանդիպմանը կցուցադրի իր սխեմատիկ խաղը: Ինչպես փոխանցում է «Արմենպրես»-ը` այս մասին լրագրողների հետ զրույցում ասաց Բելառուսի հավաքականի գլխավոր մարզիչ Գեորգի Կոնդրատեւը: Վերջինս շեշտեց, որ հրաշալի տեղյակ է նախկին ԽՍՀՄ երկրների բոլոր հավաքականներից, այդ թվում նաեւ Հայաստանի ընտրանուց:
«Հայաստանի հավաքականը գերազանց խաղ է ցուցադրում, բայց մեզ համար շատ կարեւոր է խաղի հաշիվը: Ինձ մոտ մեծ տպավորություն են թողել ձեր հավաքականի կիսապաշտպան Հենրիկ Մխիթարյանը եւ հարձակվող Յուրա Մովսիսյանը»,- ասաց Գեորգի Կոնդրատեւը:
Անդրադառնալով Անդրեյ Խաչատուրյանին, ով խաղալու է Բելառուսի հավաքականի կազմում` Հայաստանի թիմի դեմ, Գեորգի Կոնդրատեւըշեշտեց, որ Խաչատուրյանը հավաքական հրավիրվեց, երբ բելառուսներից մեկը վնասվածք էր ստացել:
Ինքը ֆուտբոլիստը` Անդրեյ Խաչատուրյանը, պարզաբանելով Բելառուսի հավաքականի կողմից ստացած իր հրավերը, ընդգծեց, որ դա իր համար բավականին անսպասելի առաջարկ էր: «Դժվարանում եմ ինչ-որ բան հստակ ասել, բայց պետք է գնահատեմ այն, ինչ ունեմ: Չեմ կարող ասել, թե ինչ կանեի, եթե առաջինը հրավերը լիներ Հայաստանի կողմից»,-ասաց Խաչատուրյանը:
Հայաստան-Բելառուս ընկերական հանդիպումը կկայանա օգոստոսի 15-ին Վազգեն Սարգսյանի անվան «Հանրապետական» մարզադաշտում` ժամը 20:00-ին: