2 րոպեի ընթերցում
ԵՐԵՎԱՆ, 11 ՀՈՒԼԻՍԻ, ԱՐՄԵՆՊՐԵՍ: Պատմությունը տղամարդիկ են գրում եւ հենց պատմության կերտման գործում կանանց դերի ու մասնակցության մասին սովորաբար լռում են: Այսպիսի եզրակացության է եկել շուրջ քսան ֆիլմերի հեղինակ, շվեդաբնակ հայազգի ռեժիսոր Սյուզան Խարտալյանը: Ինչպես «Արմենպրես»-ի հետ զրույցում նշեց ռեժիսորը, իր հիմնական առաքելություններից մեկն է համարում հենց այդ կարեւոր մարդկանց դերի մասին խոսելը, ներկայացնելը հանրությանն ու հետագա սերունդներին: «Շատերն ասում են, որ քիչ-քիչ ֆեմինիստ եմ դառնում, բայց դա այդպես չէ»,- կատակեց ռեժիսորը:
Սյուզան Խարտալյանը նոր ֆիլմի նկարահանումների վրա է աշխատում. այս անգամ թեման դարձել է ոչ թե Հայոց ցեղասպանությունը` ինչպես «Տատիկիս դաջվածքները» ֆիլմում էր, այլ` «արաբական գարունը»: «Բայց այս դեպքում էլ ոչ թե ցանկանում եմ հեղափոխության պատկերները կամ շարժառիթները ցույց տալ, այլ` ներկայացնել կանանց դերը այդ գործում: Իսկ դա հավատացեք` հիմնական շարժիչ ուժն է եղել»,- ասաց ռեժիսորը: Արդեն սկսվել են նոր ֆիլմի նկարահանումները, սակայն դեռ հայտնի չէ, թե երբ ֆիլմը պատրաստ կլինի:
«Ոսկե ծիրան» երեւանյան միջազգային կինոփառատոնի «Հայկական համայնապատկեր» ծրագրի վավերագրական մրցութում ներկայացված է Սյուզան Խարտալյանի «Տատիկիս դաջվածքները» ֆիլմը: