1 րոպեի ընթերցում
ԵՐԵՎԱՆ, 27 ՀՈՒՆԻՍԻ, ԱՐՄԵՆՊՐԵՍ: Մեծի Տանն Կիլիկիո Արամ Ա կաթողիկոսը հերթական անգամ մերժել է թուրքական հեռուստաալիքին հարցազրույց տալու առաջարկը: Ինչպես հաղորդում է «Արմենպրես»-ը` վկայակոչելով Asbarez.com լրատվական կայքը, հարցազրույցի ժամանակ, որը պետք է տևեր երկու ժամ, միջազգային հարցերի թվում քննարկվելու էր նաև հայկական հարցը: Հարցազրույցը վարելու էր թուրք հայտնիլրագրող և մտավորական Ադնան Օքթարը:
Մեծի Տանն Կիլիկիո կաթողիկոսարանի մամուլի և տեղեկատվության գրասենյակը մերժել էր հեռուստաալիքի հրավերը` ասելով, որ Արամ Ա կաթողիկոսը կմերժի նման բոլորառաջարկներն այնքան ժամանակ, քանի դեռ Թուրքիան չի ճանաչել Հայոց ցեղասպանությունը և չի փոխհատուցել հայերին:
Կաթողիկոսին ուղղված հրավերի մեջ նշված էր, որ դա «բարեկամական առաջարկ է» և «Աստված ցանկանում է, որպեսզի մեր ժողովուրդների միջև հաշտություն հաստատվի»: «Մեզ համար պատիվ է Պոլսում Արամ Ա կաթողիկոսին հյուրընկալելը»,- ասված է նամակի վերջում:
Վերջին մեկ ամսվա ընթացքում սա Արամ Առաջինինուղղված նմանօրինակ երկրորդ նամակն է. երկու հրավերներն էլ մերժվել են: