2 րոպեի ընթերցում
ԱՆԿԱՐԱ, 29 ՓԵՏՐՎԱՐԻ, ԱՐՄԵՆՊՐԵՍ: Թուրքիայի խորհրդարանում 35 պատգամավորական աթոռներ զբաղեցնող միակ քրդական «Խաղաղություն եւ ժողովրդավարություն կուսակցության» (ԽԺԿ) պատգամավոր Ալթան Թանը «Սոցիալական եւ առողջապահական ապահովագրությունների» մասին օրենքում փոփոխությունների վերաբերյալ քննարկումների ժամանակ հայտարարել է, որ Թուրքիայում դեռեւս պահպանվում է «Քեմալական դիկտատուրան»:
Ինչպես հաղորդում է «Արմենպրես»-ը` վկայակոչելով CNNTurk հեռուստաալիքը, օրինակ բերելով քուրդ գործիչներ շեյխ Սաիդի եւ Աթըֆ Հոջայի գազանային սպանությունները, քուրդ պատգամավորն ասել է. «Թուրքիայում պահպանվում է քեմալական դիկտատորության ոգին. սպանում, կախում, խոշտանգումների են ենթարկում, իսկ հետո էլ «անգլիական գործակալ» անվանում մարդկանց: Անգլիացիներն առանց մի փամփուշտ արձակելու Ստամբուլը հանձնել են թուրքերին, իսկ դուք կոտորել եք անգլիացիներին: Լավ կլիներ հանձնաժողով ստեղծեիք եւ ուսումնասիրեիք Անկախության դատարանների արձանագրությունները»:
Քուրդ պատգամավորի այս խոսքերից զայրացած` Աթաթուրքի հիմնադրած Ժողովրդահանրապետական կուսակցության (ԺՀԿ) պատգամավորները հարձակվել են Թանի վրա: Միջադեպը ծեծկռտուքի չի վերածվել` խորհրդարանի փոխխոսնակ Մեհմեդ Սաղլամի միջամտության շնորհիվ: