1 րոպեի ընթերցում
ԵՐԵՎԱՆ, 24 ՀՈՒՆՎԱՐԻ, ԱՐՄԵՆՊՐԵՍ: Շվեյցարիայում Հայաստանի արտակարգ եւ լիազոր դեսպան, ՄԱԿ-ի կենտրոնակայանում մեր երկրի մշտական ներկայացուցիչ, աշխարհահռչակ ֆրանսահայ շանսոնիե Շառլ Ազնավուրը կոչ է արել Իսրայելին` պաշտոնապես ճանաչել Հայոց ցեղասպանության փաստը:
Ինչպես հաղորդում է «Արմենպրես»-ը` վկայակոչելով «Կոլ Իսրայել» ռադիոկայանը, երեկ Փարիզում կայացած Երուսաղեմի համալսարանի միջազգային մրցանակաբաշխության ժամանակ Ազնավուրը հայտարարել է, որ միայն վերջին տարիներին է ի հայտ եկել Թուրքիայի «քարանձավային հակասեմիտիզմը»: Շվեյցարիայում Հայաստանի արտակարգ եւ լիազոր դեսպանը փաստել է, որ մերձավորարեւելյան բոլոր խնդիրներում Թուրքիան գրավել է բաց հակահրեական դիրքորոշում: