2 րոպեի ընթերցում
ԿԱՊԱՆ, 2 ՀՈԿՏԵՄԲԵՐԻ, ԱՐՄԵՆՊՐԵՍ: Երեւանից, Գյումրիից, Լոս Անջելեսից հետո հոկտեմբերի 1-ին Կապանի մշակույթի կինոդահլիճում կայացավ «Խաչագողի հիշատակարանը» ֆիլմի հերթական պրեմիերան, որը նախաձեռնել էր Կապանի քաղաքապետ Արթուր Աթայանը:
Նախքան ֆիլմի ցուցադրությունը կապանցի հանդիսատեսը հնարավորություն ունեցավ հանդիպելու ֆիլմի ստեղծագործական կազմից ռեժիսոր Հրաչ Քեշիշյանի, պրոդուսեր Մամիկոն Չատինյանի եւ ֆիլմի դերասաններից Կարեն Ջանիբեկյանի, Խորեն Լեւոնյանի ու Վահագն Գալստյանի հետ: Գործընկերների խոսքով` հարգելի պատճառով հանդիպմանը չէին մասնակցում ֆիլմի գլխավոր դերասաններ Հրաչյա Հարությունյանն ու Սամվել Թոփալյանը:
Հրաչ Քեշիշյանը շնորհակալություն հայտնեց կապանցիներին ֆիլմի նկատմամբ ունեցած հետաքրքրության համար, ինչի վկայությունը լեփ-լեցուն դահլիճն էր: Նա շնորհավորեց բոլորին հաջողված ֆիլմի համար եւ խոստացավ այսուհետ շարունակել ֆիլմեր ստեղծել հայ դասականների ստեղծագործությունների մոտիվներով:
Նա մեկ անգամ եւս շնորհավորեց Կարեն Ջանիբեկյանին` ՀՀ ժողովրդական արտիստի կոչմանն արժանանալու համար: Հյուրերը խոսեցին ֆիլմի ստեղծման դժվարությունների մասին, անդրադարձան իրենց խաղացած կերպարներին: Կապանում ֆիլմի ցուցադրության առաջին օրը մուտքը հրավիրատոմսերով էր: Հաջորդ երկու օրերին այն կլինի վճարովի` տոմսի արժեքը նախատեսված է 1000 դրամ` 500 դրամով էժան մայրաքաղաքային գնից: