1 րոպեի ընթերցում
ԻՋԵՎԱՆ, 10 ԱՊՐԻԼԻ, ԱՐՄԵՆՊՐԵՍ (սեփ. թղթ. Լիա Ներկարարյան): Աշխարհահռչակ Շառլ Ազնավուրը մասնավոր այցով ապրիլի 9-ին գտնվել է Տավուշի մարզում: Այցը սկսվել է Գոշ գյուղից Տավուշի մարզպետ Արմեն Ղուլարյանի եւ Հայաստանյաց առաքելական եկեղեցու Գուգարաց թեմի Տավուշի մարզի փոխառաջնորդ հոգեշնորհ Տ. Սասուն Ծ. վրդ. Զմրուխտյանի ուղեկցությամբ: Շառլ Ազնավուրն այցելել է Գոշավանք, Հաղարծին, որտեղ ժողովուրդը մեծ երգչին դիմավորել է աղ ու հացով, մեծ հյուրասիրությամբ: «Մենք մեր Մեծ հային, որով բոլորս հպարտանում ենք, այցի ընթացքում պատմեցինք մեր մարզի, հատկապես` Գոշավանքի եւ Հաղարծնի վանքի պատմությունը: Այս երկու հոգեւոր կենտրոններն ինքն է ընտրել, որովհետեւ ոչ մի անգամ Տավուշի մարզում չի եղել: Նրա այցի միակ նպատակն էր տեսնել այս մշակութային կոթողները եւ աղոթելե,- ասաց Տեր Սասուն Ծ. վրդ. Զմրուխտյանը: