Արամ Ա կաթողիկոսի զեկույցը Եկեղացիների համաշխարհային խորհրդում

ԺՆԵՎ, 1 ՍԵՊՏԵՄԲԵՐԻ, ԱՐՄԵՆՊՐԵՍ: Ժնեւում կայացած Եկեղեցիների համաշխարհային խորհրդի նիստում ներկայացրած իր տարեկան տեղեկագրում Մեծի տանն Կիլիկիո Արամ Ա կաթողիկոսն ընդգծել է միջկրոնական երկխոսության եւ համագործակցության հրամայական անհրաժեշտությունը: Ըստ կաթողիկոսության հաղորդագրության, Արամ Վեհափառի ելույթին ներկա են գտնվել խորհրդի կենտրոնական վարչության 168 անդամներ, Վատիկանի եւ միջազգային կազմակերպությունների ղեկավարներ, մեծ թվով լրագրողներ: Վեհափառ Հայրապետն իր այս տարվա տեղեկագիրն ամբողջությամբ հատկացրել է միջկրոնական երկխոսությանը: Նա շեշտել է, թե հին դարերից սկսած, քրիստոնեությունը մնայուն երկխոսության մեջ է եղել, մասնավորապես, Մերձավոր Արեւելքի ժողովուրդների հետ: Նա նաեւ անդրադարձել է վերջին 50 տարիների ընթացքում միջկրոնական երկխոսությանն ու համագործակցությանը միջեկեղեցական շարժման բերած նպաստին: Արամ Ա կաթողիկոսը հանգամանորեն խոսել է միջկրոնական համագործակցության ոլորտում ԵՀԽ-ի դերի կարեւորության մասին, նշելով, որ խորհուրդը պիտի իր առաջնահերթ աշխատանքներից մեկը համարի այդ համագործակցության ծավալումը: Այս ուղղությամբ Վեհափառը գործնական առաջարկներ է ներկայացրել խորհրդի առաջիկա աշխատանքների համար:-0-/13/ 11:30