2 րոպեի ընթերցում
ԱՆԹԻԼԻԱՍ, 30 ՀՈՒՆԻՍԻ. ԱՐՄԵՆՊՐԵՍ: Արամ Ա-ի կաթողիկոս ընտրվելու և օծվելու 8-րդ տարեդարձի առիթով Մեծի Տանն Կիլիկիո կաթողիկոսության բոլոր թեմերում երեկ տեղի են ունեցել Հայրապետական մաղթանքներ: Դրանք նախագահել են առաջնորդ սրբազանները, խոսելով կաթողիկոսության ու նրա գահակալի ծառայության եւ իրագործումների մասին: Ինչպես տեղեկացնում է կաթողիկոսության մամլո դիվանը, Անթիլիասի մայր տաճարում միաբան հայրերի մասնակցությամբ նույն օրը կայացած Հայրապետական մաղթանքի օրվա պատարագիչ Հայր սուրբն իր քարոզում անդրադարձել է Կիլիկիո կաթողիկոսության բազմակողմ առաքելությանն ի խնդիր հայ Եկեղեցու պայծառության ու հայ ազգի անսասանության: Պատարագից հետո դպրեվանքի սաները եւ միաբանությունը շարականի երգեցողությամբ բարձրացել են վեհարան` շնորհավորելու Վեհափառ հայրապետին ու ստանալու նրա օրհնութիւնը: Բազմությունը ևս վեհարան է բարձրացոել եւ աջահամբույրով շնորհավորել Վեհափառին: Իր կարճ խոսքում Արամ Ա-ն նախ շնորհակալություն է հայտնել իր ընտրության ու օծման 8-րդ տարեդարձի առիթով արտահայտված բարեմաղթությունների համար, ապա ընդգծել, որ «տարեդարձները չպետք է ծառայեն գահի ու գահակալի փառքը հյուսելուն, այլ խթան ու հրավեր լինեն առավել հավատքով ու նվիրումով ծառայելուն Աստուծուն, Եկեղեցուն ու ազգին: Իր խոսքի ավարտին Վեհափառ հայրապետը մաղթել է անսասանություն մեր ազգին, պայծառություն հայ եկեղեցուն և հզորություն մեր հայրենիքին: Ապա վեհարանի դահլիճում Վեհափառ հայրապետն ընդունել է տարբեր կազմակերպությունների, միությունների եւ անհատ մարդկանց շնորհավորանքները: