1 րոպեի ընթերցում
ԱՆԹԻԼԻԱՍ,6 ՓԵՏՐՎԱՐԻ,ԱՐՄԵՆՊՐԵՍ:Փետրվարի 5-ին Մեծի Տանն Կիլիկիո Կաթողիկոս Արամ Ա.-ին ընդունել է Լիբանանի հաղորդակցության նախարար Ժան Լուի Քըրտահին: Նախարարը բարի գալուստ է մաղթել Վեհափառ Հայրապետին՝ Լոնդոն կատարած իր այցելությունից վերադառնալու կապակցությամբ, ուր մեկնել էր Անգլիայի վարչապետ Թոնի Բլեերի հրավերով՝ մասնակցելու քրիստոնեա-իսլամ գործակցությանը նվիրված խորհրդակցությանը: Հանդիպման ընթացքում, Արամ Ա-ն նախարարին տեղեկացրել է քրիստոնեա-իսլամ համակեցության ու համագործակցության համար տարված աշխատանքների մասին թե միջազգային, եւ թե միջեկեղեցական շրջանակներում: Զրույցի ընթացքում խոսակցություն է ծավալվել Լիբանանի ներքին կացության շուրջ: Նախարարը Վեհափառ Հայրապետին ներկայացրել է քաղաքական ու տնտեսական պետական վերջին իրադարձությունները: Անդրադառնալով Լիբանանի հայության իրավունքների հարցին, Արամ Ա-Ն շեշտել է, թե պետության վերին պատասխանատուների պարտականությունն է հարգել Լիբանանի հայության իրավունքները: