1 րոպեի ընթերցում
ԱՆԹԻԼԻԱՍ, 29 ՀՈԿՏԵՄԲԵՐԻ, ԱՐՄԵՆՊՐԵՍ: Հոկտեմբեր 29-ին Մեծի Տանն Կիլիկիո Արամ Ա կաթողիկոսն ընդունել է Լիբանանում պապական նոր Նվիրակ Լուիջի Գատտի եպիսկոպոսին: Կիլիկիո Աթոռի մամլո դիվանի հաղորդման համաձամն, քննարկվել են Լիբանանի ներկայիս կացության հետ կապված հարցեր, հատկապես այդ երկրի համայնքների միջեւ երկխոսության ու համագործակցության կարելիությունները: Զրույցի նյութ են եղել նաեւ միջեկեղեցական խնդիրները՝ Վատիկանի եւ Ուղղափառ Եկեղեցիների փոխհարաբերությունների շրջանակներում: Վեհափառ Հայրապետն ընդգծել է քրիստոնյա-իսլամ երկխոսությունն ավելի ամրացնելու, եկեղեցական տարբեր համայնքների միջեւ գործակցություն ստեղծելու անհրաժեշտությունը: Այս առիթով նաեւ խոսվել է լիբանանահայության մասին, մասնավորապես ընդգծելով նրա դերը Լիբանանի հասարակական կյանքի տարբեր ոլորտներում: