2 րոպեի ընթերցում
ԱՄՆ նախագահ Դոնալդ Թրամփը նոյեմբերի 19-ին Չինաստանի Շենչժեն քաղաքում եռակողմ հանդիպում կունենա Չինաստանի նախագահ Սի Ծինփինի և Ռուսաստանի նախագահ Վլադիմիր Պուտինի հետ՝ Ասիա-խաղաղօվկիանոսյան տնտեսական համագործակցության՝ ԱԽՏՀ-ի գագաթնաժողովի շրջանակում։
«Արմենպրես»-ի փոխանցմամբ՝ այս մասին հայտնել է թուրքական Anadolu գործակալությունը՝ վկայակոչելով Սպիտակ տան մամուլի քարտուղարի օգնական Օլիվիա Ուելսի հայտարարությունը, որը տեղեկացրել է, որ քննարկման թեմաներից կլինի միջուկային սպառազինությունների կրճատումը։
«Նախագահը հստակ հայտարարել է, որ, ի թիվս այլ թեմաների՝ քննարկելու է աշխարհում միջուկային զենքի կրճատումը»,- ասել է Ուելսը։
Նրա տեղեկացմամբ՝ եռակողմ բանակցություններից առաջ Թրամփը Սի Ծինփինի հետ կունենա երկկողմ հանդիպում և աշխատանքային ճաշ։
Ըստ գործակալության՝ ԱՄՆ վարչակազմի բարձրաստիճան պաշտոնյան, որն անանունության պայմանով ներկայացրել է հանդիպման նախապատրաստման մանրամասները, նշել է, որ Վաշինգտոնը բանակցությունների արդյունքում համաձայնագրի ձեռքբերում չի ակնկալում։
Նույն պաշտոնյայի խոսքով՝ նախատեսվում է քննարկել նաև Իրանի հարցը, իսկ Ուկրաինայի հարցն այս ձևաչափով քննարկելու ծրագիր չկա, քանի որ այն դիտարկվում է ամերիկա-ռուսական առանձին բանակցային ուղղության շրջանակում։
ԱԽՏՀ-ի առաջնորդների 33-րդ հանդիպումը Շենչժենում անցկացվելու է նոյեմբերի 18–19-ին՝ Սի Ծինփինի նախագահությամբ։