2 րոպեի ընթերցում
Հայաստանից Եվրամիության երկրներ արտահանումը 2026 թվականի հունվար-սեպտեմբերին նախորդ տարվա նույն ժամանակահատվածի համեմատ աճել է 51 տոկոսով՝ 475 միլիոն դոլարից հասնելով 717 միլիոն դոլարի։
«Արմենպրես»-ի հաղորդմամբ՝ այս տվյալները նոյեմբերի 6-ին Ազգային ժողովում լրագրողների հետ ճեպազրույցում ներկայացրել է էկոնոմիկայի նախարար Գևորգ Պապոյանը՝ խոսելով արտահանման շուկաների դիվերսիֆիկացման մասին։
Նախարարը նշել է, որ ներկայացվող ցուցանիշները վերաբերում են հայկական ծագման արտադրանքին։
Նրա հրապարակած տվյալներով՝ Բուլղարիա արտահանումն աճել է 4,9 անգամ, Մալթա՝ 4,8 անգամ, Ավստրիա՝ 3,1 անգամ, Լեհաստան՝ 3 անգամ, Էստոնիա՝ 2,8 անգամ, Սլովենիա՝ 2,7 անգամ։ Աճ է գրանցվել նաև ԵՄ մի շարք այլ ուղղություններով։
«Արտահանել ենք տարբեր ապրանքներ՝ պտուղ-բանջարեղեն, գյուղատնտեսական մթերքներ, հանքահումքային արտադրանքներ, սարքեր-սարքավորումներ, տեխնոլոգիական արտադրանքներ»,- ասել է Պապոյանը։
Նախարարը շուկաների դիվերսիֆիկացիայի ընթացքը կապել է նաև ռուսական սահմանափակումների պայմաններում այլընտրանքային ուղղությունների որոնման հետ։
«ՌԴ-ի կողմից դրված սահմանափակումների հետևանքով մենք մեր համար բացահայտել ենք նոր շուկաներ, հայկական արտադրանքը հայտնվել է ԵՄ-ում, Մերձավոր Արևելքում, Կենտրոնական Ասիայի երկրներում։ Դա է պատճառը, որ դիվերսիֆիկացիան բավականին լավ տեմպերով ընթանում է առաջ»,- նշել է նա։
Պապոյանի գնահատմամբ՝ նոր շուկաներ մուտք գործելը նպաստել է նաև հայկական տնտեսության մրցունակության բարձրացմանը։ Նա պնդել է, որ Կառավարության աջակցության միջոցառումները թույլ են տվել լուծել գյուղմթերքի իրացման խնդիրները։
Անդրադառնալով պետական աջակցության շարունակականությանը՝ նախարարը շեշտել է, որ սուբսիդավորումը պետք է հիմնված լինի արդյունավետության վրա։
ԵՄ ուղղությամբ արտահանման՝ 475 միլիոնից 717 միլիոն դոլարի և 51 տոկոս աճի ցուցանիշները Պապոյանը հրապարակել էր նաև հոկտեմբերի 21-ին՝ ներկայացնելով հունվար-սեպտեմբերի տվյալները։