Բուլղարիայի 35-րդ անտարկտիկական արշավախմբի մասնակիցների առաջին խումբը կմեկնի սառցե մայրցամաք. BTA
1 րոպեի ընթերցում
Հոդվածը հրապարակվում է «Արմենպրես»-ի և BTA-ի միջև ստորագրված համաձայնագրի շրջանակում։
Բուլղարիայի 35-րդ անտարկտիկական արշավախմբի մասնակիցների առաջին խումբը նոյեմբերի 5-ին կմեկնի դեպի սառցե մայրցամաք։ Ինչպես «Արմենպրես»-ը տեղեկանում է Բուլղարիայի ազգային լրատվական գործակալությունից (BTA), այս մասին հայտնել են Բուլղարիայի անտարկտիկական ինստիտուտից։
Մասնակիցները Սոֆիայի «Վասիլ Լևսկի» օդանավակայանից կմեկնեն Bulgaria Air ավիաընկերության չվերթով՝ անցնելով Հռոմով, Սան Պաուլոյով, Սանտյագոյով և Պունտա Արենասով։
Պունտա Արենասում արշավախմբի մասնակիցներին կմիանա երեք ամերիկացի գիտնական, այնուհետև խումբը Չիլիի ռազմածովային ուժերի «ATF-60 Lientur» նավով կուղևորվի դեպի Լիվինգսթոն կղզի, որտեղ գտնվում է Բուլղարիայի «Սուրբ Կլիմենտ Օխրիդսկի» կայանը։
Խմբի հիմնական խնդիրն է ձմեռային շրջանից հետո վերաբացել կայանը և նախապատրաստել այն հաջորդող խմբերի լայնածավալ աշխատանքների համար։
Ընդհանուր առմամբ, արշավախմբին կմասնակցի 13 երկրից 125 մարդ, որոնք կիրականացնեն ավելի քան 35 գիտահետազոտական նախագիծ։