2 րոպեի ընթերցում
Իսրայելը քննադատության է ենթարկել Ֆրանսիայի նախագահ Էմանուել Մակրոնին ՄԱԿ-ի Գլխավոր ասամբլեայում ունեցած ելույթի ժամանակ Հորդանան գետի արևմտյան ափում Իսրայելի գործողությունները քննադատելու համար։ «Արմենպրես»-ի փոխանցմամբ՝ այս մասին հայտարարություն է տարածել Իսրայելի վարչապետ Բենիամին Նեթանյահուի գրասենյակը։
ՄԱԿ-ի Գլխավոր ասամբլեայում որպես Ֆրանսիայի նախագահ իր վերջին ելույթում Մակրոնը դատապարտել էր հումանիտար իրավիճակը Գազայում, ինչպես նաև Արևմտյան ափում Իսրայելի գործողությունները։
Մակրոնն ասել է, որ «ՀԱՄԱՍ-ը երբեք չի հարվածել Արևմտյան ափին, որտեղ գործում է Պաղեստինյան ինքնավարությունը, և որը 1967 թվականին օկուպացվել է Իսրայելի կողմից։
«Էմանուել Մակրոնի հայտարարության գրոտեսկային անհեթեթությունն ապշեցուցիչ է։.... ՀԱՄԱՍ-ի ահաբեկիչները գրեթե ամեն օր հարձակումներ են իրականացնում հրեաների դեմ։ Նրանք սպանել են անթիվ իսրայելցի քաղաքացիական անձանց Հրեաստանում և Սամարիայում», - ասվում է հայտարարության մեջ, որում օգտագործվում է Արևմտյան ափի աստվածաշնչյան անվանումը։
Նեթանյահուի գրասենյակը հիշեցրել է սեպտեմբերի 20-ին՝ հուդայականության ամենասուրբ տոնի՝ Յոմ Կիպուրի նախօրեին, Արևմտյան ափում իսրայելցի վերաբնակչի սպանության դեպքը։ Հայտարարության մեջ նշվում է, որ զոհը՝ վեց երեխաների հայր Նաթանել Շուկրունը, ուներ նաև Ֆրանսիայի քաղաքացիություն։
Իսրայելի զինվորականները հայտնել են, որ ձերբակալել են պաղեստինցի զինյալին հիվանդանոցում, իսկ ավելի ուշ զորքերը ներխուժել են նրա գյուղ։ Նեթանյահուի կառավարության նախարարներից մեկը կոչ է արել մահապատժի ենթարկել նրան՝ համաձայն նոր օրենքի։
Միևնույն ժամանակ, ՄԱԿ-ի տվյալներով՝ Արևմտյան ափում մինչև 2026 թվականի կեսերն ամեն օր գրանցվել է վերաբնակների կողմից պաղեստինցիների կամ նրանց ունեցվածքի դեմ ուղղված բռնության մոտ վեց դեպք։