Մակրոնը նախագահի պաշտոնում ՄԱԿ-ում իր վերջին ելույթում անդրադարձել է իրավիճակին Գազայում, Ուկրաինայում և Իրանում

Էմանուել Մակրոնը սեպտեմբերի 22-ին ՄԱԿ-ի Գլխավոր ասամբլեայի նստաշրջանում վերջին անգամ է ելույթ ունեցել որպես Ֆրանսիայի նախագահ՝ խստորեն քննադատելով Գազայի հատվածում տիրող հումանիտար իրավիճակը, նաև կոչ անելով մորատորիում սահմանել Ուկրաինա-Ռուսաստան պատերազմի ընթացքում քաղաքացիական և էներգետիկ թիրախների ուղղությամբ հարվածների համար։ «Արմենպրես»-ի փոխանցմամբ՝ այս մասին հաղորդում է France 24 պարբերականը։

Դիմելով իր գործընկերներին՝ Մակրոնը նշել է, որ «ջունգլիների օրենքը» կրկին վերադառնում է, և կոչ է արել երկրներին վերստին հավատարմություն հայտնել միջազգային իրավունքին և ՄԱԿ-ի համակարգին։

«Իմ ուղերձն է ամուր մնալ։ Մի՛ տրվեք զարգացող իրավիճակին...., պարտության հռետորաբանությանը, որը տեղ է զիջում կայսրությունների կողմից իշխանության չարաշահմանը՝ սպառնալով որոշ ազգերի ինքնիշխանությանը», - նշել է Մակրոնը։

Նա կոչ է արել, որ Ռուսաստանն ու Ուկրաինան համաձայնեն քաղաքացիական և էներգետիկ թիրախներին հարվածների մորատորիումի։

«Մենք ականատես ենք եղել քաղաքացիական ենթակառուցվածքների ոչնչացման և մարդու իրավունքների խախտումների։ Սա վայրագ գործողությունների նոր դարաշրջան է։ Մենք պետք է պաշտպանենք քաղաքացիական բնակչությանը և հենց այդ պատճառով ցանկանում ենք աջակցություն հայտնել կրկնակի մորատորիումին՝ էներգետիկ և քաղաքացիական ենթակառուցվածքների վրա հարձակումների մորատորիումին», - հայտարարել է Ֆրանսիայի նախագահը։

Նա նաև կոչ է արել մորատորիում սահմանել Սև ծովում առևտրային նավագնացության դեմ հարձակումների համար։

Մակրոնը նաև խոսել է Գազայի հատվածում տիրող հումանիտար ճգնաժամի մասին։

«Ի՞նչ արժեք ունի մեր հեղինակությունը, եթե անգործություն ենք ցուցաբերում Գազայի հարցում։ Ոմանք պնդում են, թե խաղաղություն է հաստատվել, սակայն դա չի հանգեցրել մարդասիրական օգնության մատակարարմանը։ Այս տեսարանն ամոթալի է մեզ համար։ Նայեք Արևմտյան ափին, որտեղ խախտումներ են տեղի ունենում։ Եվ հանուն ինչի՞» - ասել է նա։

Մակրոնն ընդգծել է, որ «երկու պետություն» սկզբունքով լուծումը նախապայման է «Իսրայելի և նրա ժողովրդի անվտանգության համար՝ թե՛ այսօր, թե՛ վաղը»։

Նա նաև հայտարարել է, որ Ֆրանսիան պատրաստ է մասնակցել Հորմուզի նեղուցում նավագնացության ապահովման միջազգային գործողության, եթե այն բացառապես պաշտպանական բնույթ կրի։

Իրանի վերաբերյալ նա նշել է, որ գլխավոր նպատակն է, որ այդ երկիրը միջուկային զենք ձեռք չբերի։ Մակրոնը նաև հայտարարել է, որ իր կարծիքով՝ հնարավոր չէ Իրանի ռմբակոծության միջոցով հասնել այնտեղ իշխանափոխության, և դա լավագույն տարբերակը չէր լինի, քանի որ «այն չի աշխատում»։

Ֆրանսիայի նախագահը նաև կոչ է արել երկրներին մշակել արհեստական ​​բանականության (ԱԲ) ոլորտում համագործակցության օրակարգ՝ ուղղված ազգային անվտանգության վրա ազդող ամենազգայուն ոլորտների պաշտպանությանը։

Մասնավորապես, նա ընդգծել է ԱԲ այլընտրանքային մոդել ստեղծելու անհրաժեշտությունը՝ ԱՄՆ-ից և Չինաստանից կախվածությունից խուսափելու համար։

«Ես չեմ ցանկանում, որ որևէ մեկը դառնա մեծ տերություններից որևէ մեկի վասալը։ Փոխարենը՝ մենք պետք է միավորվենք՝ ստեղծելու բաց հասանելիությամբ առաջնագծային մոդել՝ գերժամանակակից մի մոդել», - ասել է նա։